Буян Бурбучук, Тываның спортчу хүреш федерациязының президентизи 23-27 хүннеринде Кызыл хоорайга "Сүбедей" спорт өргээзинге болуп эртер Россияның ХХХ дугаар юбилейлиг хостуг хүреш чемпионадынга хамаарышкан бодалын илереткен.
"Россияның ХХХ дугааргы хостуг хүрешке чемпионадынга чедир санныг хонук артып калды. Шак бо онзагай болуушкунну Тываның спортсменнери, мөгелери, хостуг хүреш мөгейикилери четтикпейн манап турары чугаажок. 25 чыл бурунгаар Тывага болуп эрткен чемпионат тыва черге ам ийи дугаар болуп эртери бо. Ынчан 9 харлыг бичии-даа турган болзумза, ол улуг маргылдааны сактыр мен, радиога шаңналдыг чер алган тыва мөгени чарлап турган чүве, ол болза ам Тываның спортчу хүреш чыынды командазының тренери Сараа Аян Кара-оолович болгай. Аңаа кызыгаар чок чоргаарланып турган мен. Ынчангаш бо хүнде Тывага юбилейлиг чемпионатты организастап эрттиреринге киржип турарым улуг аас-кежик.
Амгы чемпионаттың чамдык сан-чурагайларын сонуургадыйн:
- 44 регион киржир
- 350 ажыг спортчулар кээп киржир
- 26 мөге Тываның чыынды командазындан хүрежир
- 20-ден 35 хар – киржир мөгелерниң ортумак назыны".
