Владислав Ховалыг Россия Федерациязының иштики херектер органнарының ажылдакчыларынга болгаш хоочуннарынга профессионал байырлалы-биле байырны чедирген. Тываның Баштыңы бодунуң блогунда корум-чурум камгалаар органнарның ажылдакчыларының хөй-ниити корум-чурумун тударынга, кем-херек үүлгедии-биле демисежиринге, республикада турум чорукту болгаш айыыл чок чорукту хандырарынга улуг ажыл-албанын демдеглээн.
"Бөгүн Россияның иштики херектер ажылдакчызының хүнү. Хөй-ниити корум-чурумун кадагалаар, кем-херек үүлгедии болгаш коррупция-биле демисежир, террор болгаш экстремизмге удур туржур, кем-херек үүлгедиишкиннерин болдурбас дээш ажылдап чоруур кижилерниң профессионал байырлалы-дыр" - деп, Владислав Ховалыг байыр чедириишкининде айыткан. Тываның чурттакчылары амыдыралының эң-не берге болгаш айыылдыг үелеринде оларже долгап, кезээде дузаны база деткимчени ап чоруурун ол демдеглээн.
Иштики херектер яамызының ажылдакчыларынга болгаш хоочуннарынга ниитилелге бараан болуп, даңгыраанга шынчы, кандыг-даа үеде дуза кадарынга белен чоруу дээш, республика Баштыңы сеткилиниң ханызындан өөрүп четтиргенин илереткен. Владислав Ховалыг иштики херектер албан черлериниң хоочуннарынга болгаш амгы ажылдакчыларынга быжыг кадыкшылды, өг-бүлезинге чаагай чорукту, тура-сорукту, төрээн чуртунга бараан болурунга чаа-чаа чедиишкиннерни күзээн.
1922 чылдың март 16-ны Тывада Иштики херектер яамызының албан езузу-биле тургускан хүнү деп санап турар. Бо хүн Тыва Арат Республиканың 43 кижи штаттыг Иштики херектер яамызын тургускан Таңды-Тыва Улус Республиканың Улусчу Чазааның протоколунга атты салган. Чаа ведомство аныяк күрүнениң иштики айыыл чок чоруун хандырар, күрүне кызыгаарларын камгалаар, хувискаалга удур чорук-биле демисежир, ол ышкаш ол үеде улуг айыылдыг дээрбечи болгаш мал оорунга удур хөделирин айыткан.
Иштики албан чери бодунуң эрткен төөгүзүнде чаңгыс эвес катап эде чаарттынган, 1927 чылда тургустунган ТАР-ның ИХЯ чанында милицияның кезээ Кызыл хоорайга хөй-ниитиниң корум-чурумун болгаш санитарлыг байдалын камгалап эгелээн. 1931–1932 чылдарда Иштики херектер яамызының штады немежип, Улусчу милиция эргелели тургустунган. 1944 чылдың октябрь 11-де Совет Эвилелиниң составынче ТАР-ның каттыжып киргениниң соонда, ол-ла чылдың октябрь 26-да ТАР-ның ИХЯ-зы Кызыл хоорайда бактааттынган Тыва автономнуг областа НКВД эргелелинче шилчээн. Бо болуушкун бот-тускайлаң ажылды эде чаартып, чаа албаннар болгаш кезектерни ажыткан.
2011 чылдың март 1-де «Полиция дугайында» Федералдыг хоойлу күш киргенде, ведомствонуң төөгүзүнде чугула үе-чаданы ажыткан. Бо хоойлу милицияны полиция кылдыр эде адаарынга чедирген, ооң түңнелинде үр үе дургузунда милиция хүнү деп билдингир турган профессионал байырлалды Россия Федерациязының Иштики херектер органнарының ажылдакчызының хүнү кылдыр эде адаан.
ТР-ниң Чазааның парлалга албаны.