Тываның Баштыңы Владислав Ховалыг чурттуң найысылалынга сенатор Д. Оюн, республиканың саң-хөө сайыды О. Достай, кадык камгалал сайыды А. Югай болгаш регионда Албан эмчи камгаладылгазының фондузунуң удуртукчузу В. Анай-оол-биле кады Россияның кадык камгалал сайыды М. Мурашко база федералдыг Албан эмчи камгаладылгазының фондузунуң удуртукчузу И. Баланин баштаан удуртукчулар-биле ужурашкаш, республиканың кадык камгалал адырында нарын айтырыгларны чугаалашканын дыңнаткан.
Ужуражылга үезинде В. Ховалыг бир дугаар ээлчегде эмнелге ажылдакчыларының шалың төлевирлерин өстүреринге хамаарышкан айтырыгны көдүрген.
“Регионнуң бюджединде ук айтырыгны чогумчалыг кылдыр шиитпирлээр арга-шинек чок болуп турар. Михаил Альбертович биле Илья Валерьевичиге көдүрген айтырыгларымга онза кичээнгейлиг болганы дээш сеткилимден өөрүп тур мен. Тываның кадык камгалал адырын сайзырадырынга ук айтырыгларны дарый шиитпирлээри чугула. Эмнелге ажылдакчыларының акша-шалыңын өстүреринге хамаарышкан шак бо айтырыгны сайгарып, шиитпирлээр оруктар дилээр талазы-биле ажылчын бөлүктү тургузарын М. Мурашко даасты. Оон аңгыда Республиканың бичии уруглар эмнелгези, онкология диспансери, туберкулезка удур демисел чорудар диспансеринге чаа оран-сава тудуунуң айтырыгларын чугаалаштывыс” – деп Владислав Ховалыг дыңнаткан.
Россияның Кадык камгалал яамызында Тывага тудуг ажылын чорударының онзагай, нарын байдалдарын эки билип турар болгаш регионнуң удуртукчуларының киирип турар санал-оналдарын кичээнгейлиг өөренип көрүп турар дээрзин Чазак Баштыңы чугулалап айыткан.
