Чиигелделиг ипотеканың дугайында, ук программаның боттанылгазының дугайында ДОМ.РФ. (https://t.me/domrf_life) компанияга болуп эрткен ужуражылгага сайгарып чугаалашкан дугайында Тываның Баштыңы Владислав Ховалыг социал четкиде бодунуң арынынга бижээн.
Бистиң чаңгыс чер чурттугларывыс чаа хуулуг чээлилерни ап эгелээн. Республиканың Чазаа база бүгү-ле күжениишкиннерни үндүрүп, тудугларны шапкынчыткан. Федералдыг эрге-чагыргаларның деткимчези база хилис барбаан. Чуртталга оран-савазының рыногу дирлип, тускайжыттынган тудуг организацияларының саны өскен, тудуг адыры көдүрүлген.
Бир чыл бурунгаар чиигелделиг ипотеканы бистиң республикага нептередири барык болдунмас херек ышкаш сагындырып турду. Ынчалза-даа ДОМ.РФ компанияның чиңгине директору Виталий Леонтьевич Мутконуң деткимчези ажыл-херектиң шуудаарынга дыка дузалыг болган. Бо күрүне компаниязының специалистери бистиң регионнуң программазының оператору болуп, ажыл-иштиң бүгү чадазында ажыктыг сүмезин берип келгеннер. Чедип алдынган түңнелдерге мага ханып, 2024 чылдың планнарын чугаалажыры магалыг-дыр.
Виталий Мутконуң чугаазы-биле алырга, кады ажылдажылганы калбартырынга сонуургалды, регионнуң тудугларынче инвестициялар хаара тударының арга-хоргаларының дилээшкинин ол көрүп турар. Ооң сан-медээзи-биле алырга, чиигелделиг ипотеканы Тывага ажыглап эгелээн үеден бээр чүгле ийи неделяның дургузунда безин 100 хире чээлини чурттаар оран-савага хереглелдиг кижилерге тывыскан. 2023 чылдың төнчүзүнге чедир ам-даа 800 ипотеканы тыпсыры көрдүнүп турар. Республикада идепкейлиг ажыглап турар база бир механизм болза, октаттынган, ээн турар федералдыг черлерни, объектилерни маңаа хаара тудуп турары болур деп ДОМ.РФ компанияның чиңгине директору чугаалаан. 2010 чылдан тура Тывага чуртталга оран-савазын тударынга 45 ажыг гектар черни дамчыдып берген. Оон-даа өске төлевилелдер ДОМ.РФ компанияда бар, олар Тываның чурттакчыларының амыдыралын улам экижидер деп, Виталий Леонтьевич онзалап демдеглээн.
А. ХЕРТЕК белеткээн.
«Шын» №78 2023 чылдың октябрь 14