Бөгүнгү байдал-биле бир дугаар ээлчегде шиитпирлээр сорулгаларның бирээзи – бистиң Төрээн чуртувустуң камгалакчыларын деткиири. Оларның ниитилелге туружун катап тургузуп, тайбың амыдырал агымынче киирип, хөй-ниитиже хаара тударынче онза кичээнгейни угландырган. Ынчалдыр Тываның Баштыңы Владислав Ховалыгның эгелээшкини-биле бо чылын тускай шериг операциязының киржикчилеринге боттарының мергежил талазы-биле ажыл-агыйынга чаа бедиктерже үнер арганы берип турар «Тываның маадырлары» деп төлевилел эгелей берген.
Садчылар чайгы сезонга шагда-ла белеткени бергеннер. Чижээлээрге, Каа-Хем суурда Домажыктарның өг-бүлезинде теплицада огурец, помидорларның болгаш өске-даа ногаа-чимистиң аңгы-аңгы сорттары чечектелип, кайгамчык байлак дүжүт өзүп турар.
“Оглумнуң социал керээ программазынга киришкеш тургузуп алган теплицазы-дыр. Ында ажылдар декабрь айдан эгелээн. Бистиң өг-бүле ногаа өстүрер талазы-биле ажылды шагда-ла кылып эгелээн, ынчангаш оглум база бичиизинден-не огород ажылынга чаңчыккан. Ажыл берге-даа болза, шуптузунга четтигип тур бис. Оглувус ТШО-га турда арай бергедежип турдувус” — деп, дайынчы хөделиишкиннер хоочунунуң авазы Полина Домажык оглунуң ажыл-агыйын таныштырган.
Санчай Домажык күрүне деткимчезиниң ачызында теплицазынга чаа дериг-херекселди садып алгаш, огородун улгаттырган. Ол агроном эртемниг болгаш, ногаа тарыыр деп шиитпирлеп алган. Саглаңнадыр өзүп турар ногааларны көөрге-ле, ол бодунуң эртемин хөлчок эки билир дээрзи көстүп турар.
2022 чыл ажыл-ишчи Санчай Домажыкка уттундурбас чыл болган. Ол бодунуң ажыл-херээн тургускаш, оон ТШО-га киржири-биле керээ база чарып алган. Ынчалза-даа 2 чыл бурунгаар ол Тывазынче чанып келген, чүге дизе ону бажыңында 3 бичии кыс уруу манап турган. Дүүн чаа-ла «Архитектор» деп дайынчы шолалыг тыва эр Төрээн чурту дээш мурнуку одуругга тулчуп турган болза, а бөгүн ол хүннүң-не даң бажында 5.00 шактан тура чаңгыс чер чурттугларының кадык-чаагай чоруу дээш бодунуң теплицазында ажылдап турар.
“Кижилер экологтуг, арыг аъш-чем садып чиксээр. Садып алыкчыларым хүннүң-не кээр-дир. Колдуунда бистиң суурнуң чурттакчылары кээп турар. Огородувуста эң-не хереглелдиг ногаа аймаан өстүрүп турар бис” — деп, Санчай Домажык чугаалаан.
Ажыл-агыйы дыка эки шуудап эгелээрге, дайынчы хөделиишкиннер хоочуну агробизнезин улгаттырар деп шиитпирлеп алган. Амгы үеде Санчай Домажык бодунуң акша-хөреңгизи-биле өзүмнер садар хуу садыг ажыдар деп турар. А өске планнарын боттандырарынга «Тываның маадырлары» деп регион төлевилели дузалаар.
“Биче бизнес эгелеп алыры болгаш сайгарлыкчы чорук” угланыышкынныг төлевилелче чагыг киирген мен. Ол угланыышкын-биле ажылымны улгаттырар сорулгалыг мен. Чижээ, шөлге картофель болгаш капуста өстүрер планныг мен. Бо төлевилел ТШО киржикчилеринге дыка ажыктыг, чүге дизе дайын шөлүнге эрес-дидим шынарларын, анаа чуртталгада база көргүзүп болгай. Ол ышкаш удуртур ажылга азы кандыг-даа адырга ажылдап болур. Ол бистиң шериглерге улуг күчү-күш-түр” — деп, Санчай Домажык чугаалап турар.
Бо төлевилел Тываның Баштыңы Владислав Ховалыгның эгелээшкини-биле ажылдап турар. Ооң кол сорулгазы тускай шериг операциязының киржикчилерин мергежил талазы-биле сайзырадыры болур.
Орлана БОЙДУ.
«Шын» №16 2025 чылдың май 1
