Тываның Кадык камгалал яамызы Сибирь федералдыг округтуң медицина дээди өөредилге черлеринче тускай сорулгалыг олуттарже документилерни июньнуң 20-ден тура хүлээп эгелээр. Чаңгыс аай күрүне шылгалдаларының (ЕГЭ) түңнелдери-биле химияда, биологияда база орус дылда 39–40 баллдан өрү көргүзүглүг доозукчулар-биле тускай сорулгалыг олутка өөренир керээлерни чарар. Новосибирскиниң күрүнениң медицина университеди эң-не бедик баллдарны – химия биле биологияга 50-ден куду эвес көргүзүгнү негээн.
Бо чылын Сибирьниң эмчи дээди өөредилге черлери Тываның доозукчуларынга шупту 120 олутту берген. «Эмнээшкин херээ» деп мергежилче Алтайның күрүнениң медицина университеди – 33, Кемеровонуң – 10, Новосибирскиниң – 2, Сибирьниң күрүнениң эмчи институду – 45 тускай олутту аңгылап берген. «Педиатрия» деп мергежилче Кемеровонуң эмчи институду – 10, Сибирьниң күрүнениң эмчи институду 30 олутту тускайлаан.
Абитуриентилер шилилдеже дараазында чүүлдерни дужаар:
- хол-биле бижээн билдириишкин (майык езугаар);
- бодун шынзыткан документиниң хоолгазы (паспорттуң 1-ги база киир бижилге арыннары);
- аттестаттың азы ортумак тускай өөредилге черин дооскан дипломунуң хоолгазы.
Республиканың хүлээп алыышкын комиссиязы документилерни дараазында адреске хүлээр: Кызыл хоорай, Салчак Тока кудумчузу, б. 14.
Тускай угланыышкын-биле өөренир керээниң өзек пунктузу – өөредилге программазын шиңгээдип дооскан соонда, үш азы оон хөй чыл иштинде тодаргай эмнелге организациязынга ажылдаары албан дээрзин билзе чогуур. Бир эвес доозукчу кижи бодунга алган хүлээлгезин күүсетпес болза, хамаатының өөредилгезинче федералдыг бюджеттен угландырган чарыгдалдарны торгаал кылдыр эгидер. Бир эвес тускай сорулгалыг өөредилге керээзин чарган студент өөредилгезин дооспайн барза, ону өөредиринче чарыгдаан түң хире акша-хөреңгини эгидер ужурлуг.
Тыва Республиканың Кадык камгалал яамызының Билиг-мергежил бедидер төвүнүң 8(394-22)24039 дугаарлыг телефонунче долгааш, айтырыгларга тайылбырны ап болур.
Бистиң корр.