Тыва Республикада Росреестр эргелели шимчевес өнчү бүрүткээр күрүнениң чаңгыс аай реестринче (ЕГРН) регионнар аразының кызыгаарынга хамаарышкан эдилгелер киирер ажылын дооскан. Ук ажыл күрүне программазының деткимчези-биле болган.
Росреестр албан чериниң демдеглеп турары-биле алырга, Россия Федерациязының субъектилериниң бот-боттарының аразында кызыгаарларны демдеглээри болгаш оларны бүрүткээри реестрни долу болгаш ылап шын долдурарынга «Девискээрлер медээлериниң национал системазы» («Национальная система пространственных данных») деп күрүне программазының чугула даалгазы болуп турар.
«Тыва Республикада Росреестр эргелели өске организациялар-биле кады 2017 чылдан эгелээш, Тываның өске регионнар-биле кызыгаарларын ылавылап тодарадыр ажылдарны чорудуп эгелээн. Ниитизи-биле 4 муң хире километр черниң кызыгаарын реестрже киирген. Шак мындыг ажылдарның соонда регионнар аразынга кызыгаарлар талазы-биле чөрүлдээлер турбас дээрзи билдингир» – деп, Тыва Республикада Росреестр эргелелиниң удуртукчузу Светлана Тулуш чугаалаан.
ТР-ниң Баштыңының болгаш кожа регионнарның удуртулгазының ат салган документизинге үндезилээш, кызыгаарларны ылавылап айыткан. Ат салган дугуржулга бижиктерде картографтыг болгаш координаттарын айыткан документилер коштунган.
«РФ-тиң Президентизиниң даалгазын езугаар кылдынган ажылдар-дыр ийин. Тыва дээрге Россияның 5 субъектизи-биле кызыгаарлажып чыдар. Кызыгаарны анаа-ла алгаш салып албас. Кожаларның чөпшээрели херек. Ийи аңгы республиканың азы регионнуң удуртукчуларының ат салган документизинге үндезилеп, кадастр ажылдарын кылып чорудар. Ол дээрге база дыка улуг ажыл-дыр.
Кандыг-даа ажылды кылып турда, частырыглар тургустунуп кээп болур. Чижээлээрге, Красноярск крайның сумуларының кызыгаары Тываның девискээринче кирип келген турган. Ол бүгүге хамаарыштыр эдилгелерни кылып доозупкан бис. Ам болза тус черлер чагыргалары бодунуң девискээриниң кайыын тура каяа четкенин, тускай капсырылгаже киргеш, боттары көрүп ап болур апарган.
Чер кодекизин езугаар черлерни канчаар үлээриниң дугайында хоойлуда бижээн. Черни чөпшээредип алгаш, кадастр инженеринге кылдырып алыр. Кижи бүрүзү бодунуң девискээрин билир апаар. Бир талазында ажык медээ-дир ийин. Бөдүүн чон-даа ону көрүп болур. Чер кымның адында дээрзин чүгле күрүне албан чери көрүп болур, а хууда хамаатыларга ол медээ ажык эвес. Бо чылын 146 сумунуң кызыгаарларынга эдилгелерни киирген бис»– деп, Тывада Роскадастрның директору Леонид Дамдын чугаалаан.
Айдың ОНДАР.
“Шын” №96 2024 чылдың декабрь 14