Тыва Республиканың регионалдыг төлевилелдер офизи губернатор төлевилелдериниң түңнелдерин үндүрүп тура, «Улусчу картофель» төлевилел «Смартека» деп турум хөгжүлдениң федералдыг чурагайлыг платформазынче кирген дээрзин дыңнаткан. Амыдыралы чегей өг-бүлелерге деткимче көргүзер талазы-биле эң-не эки практика дээш ол төлевилелди чурттуң өске-даа субъектилеринге тарадырын саналдап турар.
Губернатор төлевилелиниң утказы мындыг– ногаа өстүрер черлиг, амыдыралы чегей өг-бүлелерни картофель үрезини-биле хандырар. Картофель үрезини алган улус чай дургузунда боттарының күжү-биле дүжүттү ажаап алгаш, «ийиги хлевин» курлавырлааш, келир сезонга чедир боттарын үрезин-биле хандырар ужурлуг. Ынчап кээрге эрге-чагырга өг-бүлелерниң материалдыг байдалын чүгле экижидер эвес, боттарын хандыртынып шыдаар арганы берип турар.
Бо чылын «Улусчу картофель» төлевилелдиң шугуму-биле 21637 өг-бүле адрестиг дузаны алган. Республиканың 18 муниципалдыг тургузугларының чурттакчылары күрүне деткимчезин ажыглаар аргалыг болган. Эң-не хөй киржикчилер Кызыл хоорай биле Улуг-Хем кожуунда чурттап турар. Июнь айда төлевилелдиң шупту киржикчилери картофель үрезинин олурткан. Өг-бүлелер тарып алган картофелин канчаар ажаап турарын төлевилелдиң күүседикчилери ТР-ниң Көдээ ажыл-агый яамызы, Күш-ажыл болгаш социал политика яамызы кожуун чагыргалары-биле эки хайгаарап турар. Херек болза, оларга ногаа олуртурунуң болгаш ажаап өстүрериниң мастер-класстарын организастап турар.
«Улусчу картофель» губернатор төлевилел 2024 чылда доостур.
«Смартека» дээрге социал-экономиктиг сорулгаларны шиитпирлээринге аңгы-аңгы адыр аайы-биле эң-не эки практикалар дилээр талазы-биле сервис-тир. Тываның «Улусчу картофель» төлевилели эң эки регионалдыг практикалар санынче кирген.
Бистиң корр.
"Шын" №57, 2023 чылдың август 2