“Бо чылдың 9 айының дургузунда Тываның экономиказы ниитизи-биле өзүлделиг болган. 2023 чылдың дургузунда регионалдыг каттышкан продукт 100 млрд хире рубль болган. Ол дээрге амдыызында баш бурунгааргы саннар-дыр, ынчалза-даа олар бүзүренчиг көстүр, чүге дизе амгы үеде чамдык адырларда бүдүрүлгениң көргүзүглери өзүлделиг болган. Чижеглей алырга, демир-деске хамаарышпас минералдыг продукцияның бүдүрүлгези-биле, пөс-таавы, тускай идик-хеп дааранылгазы болгаш өске-даа төлевилелдиң боттанылгазы-биле болбаазырадылга үлетпүрүнде өзүлдениң индекизин көрүп турар бис.
Тываның социал-экономиктиг хөгжүлдезиниң амы-хууда программазының боттанылгазы, ооң иштинде болбаазырадылга болгаш тывыш үлетпүрүнде, туризм адырында улуг төлевилелдерниң, электри хандырылгазының комплекстиг планының күүселдези инвестицияларның өзүлдезин болдурган. Бо чылдың 9 айында республиканың кол капиталынче 10 млрд рубльди салган, ол дээрге 2022 чылдың ол-ла үелеринге көөрде, 3,2 хуу өзүлделиг болган. Ол бүгү бистиң регионну ажыл-херек чорударынга идегелдиг, таарымчалыг хүрээлел кылдыр көрүп эгелээни ол-дур” — деп, Тываның Баштыңы Владислав Ховалыг социал четкилерде бодунуң арынынга бижээн.
А. ХЕРТЕК белеткээн.
Чуруктарны интернеттен алган.
“Шын” №79 2023 чылдың октябрь 18
