Наадым байырлалының бир онзагай кезээ — «Ыраажы малчын» мөөрей. Тос-Булакка бөгүн ук мөөрейниң кожууннарга тергиидээн тиилекчилери Наадымның сценазынга ырыларын бараалгаткан. Малчын ыраажыларның аразында Каа-Хем кожуундан Зоя Донгактың күүселдези бир онзагай болган.
«Каа-Хем кожууннуң Шаң-Аксы деп черде 4 дугаар чыл малчыннап тур мен. Өөм ээзи-биле 36 чыл хуу малды азырап чоруур бис. Школадан хүндүлүг дыштанылгаже үнгеш, малчыннай берген бис. Дерзиг-Аксы школазынга орус дыл болгаш чогаал башкылап, өөредилге эргелекчилеп, директорлап-даа ажылдаан мен» — деп, Зоя Николаевна бодун таныштырды.
Зоя Николаевна «Чурумалдыг Дерзиг-Аксы» деп ырызының сөзүн болгаш аялгазын боду чогааткан. Ол ырызының дугайында мынчаар тайылбырлады: «Черле школага ажылдап тургаш-ла сценарийлер тургузуп, бичии чогаадып бижиир чүүлге сонуургалдыг турган мен. Ам бо пенсияже үнгеш шүлүк бижип эгеледим. Бо ырыны Дерзиг-Аксының 100 чыл юбилейинге баштай шүлүк кылдыр бижээн мен. Ооң соонда ыңай-бээр концерттерге киржирде, чер-чуртувус дугайында, чаа үениң ырылары чок боорга, ыры кылдыр чогаатканым ол».
Зоя Николаевнага «Ыраажы малчын» деп мөөрейниң республика чадазынга шаңналдыг черни алырын күзеп каалыңар.
Бистиң корр.