Мөңгүн-Тайганың Мөген-Бүренге Иелер хүнүн уткуштур сумунуң культура ажылдакчылары солун концерт, оюн-тоглаалыг чараш байырлалды организастап эрттирген. Аңаа суурнуң улуг-биче чону чыглып, аваларга ыры-шүлүүн бараалгадып, кончуг чараш байыр чедириишкиннерин кылган.
Концерт эгезинде “Мөген-Бүрен” КХН-ниң удуртукчузу, хөйге билдингир эне Өшкү-Саар Аракчааевна Ооржак бүгү чонга байыр чедиргеш, ылаңгыя аваларга, оларның аразында ТШО киржикчилериниң иелеринге онза хүндүткелин илередип турарын демдеглээн.
Билдилиг удуртукчу бодунуң организациязында ажылдап турар малчын авалар: Светлана Эне-Бижиевна Салчак, Чейнеш Ивановна Салчак, Чаймаа Тараачыевна Салчак, Байлак Тараачыевна Иргит, Уран Делгер-ооловна Иргит, Анай-Хаак Деспиевна Доржу болгаш бүгү назынында “Мөген-Бүрен” совхоз турда-ла, бухгалтерлеп ажылдааш, мынчага чедир ында ажылдап чоруур сес ажы-төлүнүң, дөртен чеди уйнуктарының ынак авазы, кырган-авазы Зоя Шожаловна Сюрюнмаага “Чедер” курортунга кадыын быжыглап алыры-биле сертификаттарны тывыскан.
“Ёзулуг маадырлар – бистиң ТШО-га киришкен дайынчыларывыстың авалары-дыр. Олар ажыг-шүжүгге таваржып, чок дээн чараш оолдарын чидирген-даа болза, холу салдынмайн, ажыл-ижин ам-даа уламчылаар тура-соруктуг, күштүг авалар-дыр” – деп, Өшкү-Саар Ооржак чугаалааш, бодунуң бижээни “Авамга” деп шүлүүн номчуп күүсеткен.
Өшкү-Саар Аракчааевна чүгле удуртукчу болурундан аңгыда, шүлүк бижииринге сундулуг дээрзин чаңгыс чер чурттуглары билир. Ооң база бир “Дайынчының авазының ыызы” деп чаа бижээн шүлүү чоокта чаа “Шын” солунга үнүп кээрге, ону дораан шээжи-биле доктаадып алгаш, Кызыл-Хаяның уругларның уран чүүл школазының директору Урса Монгуш аваларга тураскааткан концерт үезинде номчуп күүсеткен. Ону дыңнааш, зал долдур көрүкчүнүң аразындан карааның чажын бүдүү чодуп олурганнар хөй болган.
Бистиң корр.
Чуруктарны интернеттен алган.
“Шын” №47 2025 чылдың декабрь 4
