Сентябрь 27-де Тывага бир автогрейдер биле узуп чүдүрер ийи техниканы эккелген. Оларны республиканың кожууннарында база найысылалында чер-черде чурум чогу-биле оваалап төп каан боктар аштап арыглаарынга ажыглаар.
Чаа машина-техниканы Тываның соңгуттурган Баштыңы Владислав Ховалыгның дилээ-биле федералдыг чазактың немей үндүрүп берген 1,5 миллиард рубль акшаландырыышкынның ачызында садып алган.
«Тываның Чуртталга-коммунал яамызы биле Бойдус яамызы кады 282 миллион рубль түңнүг акша-биле 42 тускайлаттыган техниканы садып шиңгээткен. Бөгүн оларның үжү чедип келгени ол» — деп, республиканың Чуртталга-коммунал ажыл-агыйының сайыдының оралакчызы Эдуард Күдер чугаалаан.
Республиканың Чуртталга-коммунал ажыл-агый яамызы чаа эккелген техниканы хүлээп алган, херек апаарга-ла, машина-техниканы ведомствонуң эргелеп-башкарар бүдүрүлгелеринге чорудуп бээр. Улуг самосвалдар, КамАЗ-тягач, кыдыындан бок чүдүрер мусоровоз машиналарны чыл төнчүзүнге чедир удаа-дараалаштыр эккээр.
Тускайлаттынган техниканы сорулгазынга дүүштүр ажыглап, коммуналдыг кадыг боктарны аштап чүдүрер болгаш үндүр сөөртүр ажылдарны күштелдирер.
Р.ДЕМЧИК белеткээн.
Буян ООРЖАКТЫҢ тырттырган чуруктары.
#Чуртталга_коммуналажыл_агый #Бойдусяамызы #Техника #Тыва #Тува #Шынсолун #Тывадыл #Тывамедээ #Tuva #Shyntuva
