РФ-тиң Чазааның чанында Координация чөвүлелинге Кадык камгалал яамызының сайыды Михаил Мурашко аарыг улус көвүдеп турар регионнар санынче Тыва Республика киргенин айтыкан.
Росхереглелхайгааралдың Тывада эргелелиниң сөөлгү медээзи-биле алырга, эрткен хүннерде Кызылдың стационарлыг госпитальдарында 1192 аарыг кижи эмнедип турар, ооң иштинде лабораторлуг бадыткаттынган диагностуг 1139 кижиниң 109-зу бичии уруглар, 114- иштиг херээженнер болуп турар.
Найысылалдың эмчи организацияларының базазында Call-төптер хүннүң-не 4000 ажыг медээни телефон дамчыштыр хүлээп турар.Февраль 3-түң хүнүнде 4610 медээ кирген. Ол медээлерни шуптузун демдеглээш, кандыг дуза хереглеттинип турарын операторлар удур-ла ажылдап кылып турар. Ковид-бригадалар аарыг улустуң бажыңнарынче дарый үнүп, анализтерин ап, кандыг эмнээшкин негеттинип турарын тодарадып турар.
Бичии уругларга эмчи дузазын чедирери-биле 24 эмчи бригадазы ажылдап турар, ооң иштинде дүрген эмчи дузазы чедирер бригада -15. Кызылдың поликлиникаларында, микрорайон бүрүзүнге хамааржыр терапевт участоктарында безин үш-үш ковид-бригада ажылдап турар.
План ёзугаар ниити эмнээшкиннерни тур када соксаткан болганда, хоочураан аарыглыг болгаш инвалид хамаатыларны, чаа төрүттүнген чаштарны эмчилер кичээнгей чок артырбаан. Оларның бажыңнарынче чедип, эмчи шинчилгезин чорудуп, доктаамал хайгааралда тудуп турар. Шак ындыг “арыг” бригадаларга немелде автотранспорт негеттинип турар.
Пандемияның эгезинден тура эмчи организацияларында автотранспорт чедишпезиниң дугайында айтырыгны шиитпирлээри-биле Тываның чазаа бүгү яамыларның болгаш өске-даа албан организацияларының, чазактың бодунуң автобазазының машиналарын хаара туткан турган.
Бо удаада албан черлеринден хаара туткан машиналарның санын ам-даа көвүдедир айтыышкынны Чазак хүлээп алган.
Аңаа үндезилээн документ ёзугаар хүннүң-не дараазында албан черлери көрдүнген санныг машиналарны эмнелгелерге аңгылап бээр ужурлуг:
ТР-ниң Өөредиге яамызы – 7, Күш-ажыл болгаш социал политика яамызы - 2, Культура болгаш туризм яамызы - 4, Орук-транспорт комплекизиниң яамызы-2 машинаны аңгылаар. Ол ышкаш Тудуг яамызы, Арга-арыг ажыл-агыйының яамызы, Чурагайлыг хөгжүлде яамызы, Спорт яамызы, Көдээ ажыл-агый яамызы, Чуртталга-коммунал ажыл-агый яамызы болгаш Күрүне комитеттери, агентилелдер шуптузу ийиден эвээш эвес машиналарны хүннүң-не эмнелгелерге аңгылаар ужурлуг. Кызылдың мэриязы үштен эвээш эвес машинаны эмчи бригадаларын дажыырынга аңгылап бээр.
Кожууннарда байдалды өөренип көрүп тургаш, төп кожуун эмнелгелеринге чугула херек апарган үеде машина-биле хандырар айтырыгны Тываның Баштыңының айтыышкыны ёзугаа кожуун чагыргазы саат чок шиитпирлээр ужурлуг.
