"НААДЫМ - 2020"
Наадым чоокшулаарга кижиниң хей-аъды бедиир дээш-ле, интернет четкизинде мындыг солун бижиктер бар. Малчыннар байырлалы дээрге шынап-ла, кымга-даа өөрүнчүг болбайн канчаар. Оон ыңай бо чылын аарыг хамчык дээш, хамык хемчеглерни кызыгаарлаан болгай. Ынчалза-даа хемчеглер эртип турар, чүгле дүрүмнү шыңгыызы-биле сагыыр ужурлуг.
Август 26-да Таңды кожууннуң малчыннар байырлалы чурумалдыг Чагытайга болуп эрткен. ТР-ниң Дээди хуралының депутаттары Артур Монгал, Елена Ховалыг малчын чонга байыр чедирип, шаңнал макталды-даа чымыш ижин үнелеп көргеш, бергеннер. Республиканың девискээринге ажылдап кылган “Аныяк – өг-бүлеге кыштаг”, “Чаа сорук” төлевилелдерниң киржикчилериниң ажыл-агыйын база онзалап демдеглээн.
База Таңды кожууннуң мурнакчы аныяк малчыны Сайдаш Монгуш, Геннадий Монгуш (“тергиин мал ажаакчызы”), Мерген Ооржак (“тергиин чылгычы”), Айлуна Санчы-оол (“тергиин саанчы”), Олег Бадыжык (“ тергиин малчын”) хүндүлел бижиктер-биле шаңнаткан база белектерни “Чаңгыс демниг Россия” партиязының төлээлеринден алгаш, өөрээн сеткилин чугаалааннар.
Оон ыңай Александр Оюн аныяк малчыннарның аразынга кыштаг-хораазын шалыпкын тудупкаш, төлевилелдиң “чемпиону” атка төлептиин бадыткаан. А Николай Монгушка “1-ги чергениң мурнакчызы”, Марат Чоодуга “2-ги чергениң мурнакчызы” деп тускай шаңналга кожуун чагыргазы хүндүлел бижиктерни тывыскан. Хөй чылдарда үре-түңнелдиг ажылы дээш база Таңды кожууннуң көдээ ажыл-агыйының хөгжүлдезинге үлүүн киирип келген “2020 чылдың чемпиону малчын” Леонид Оюнну шаңнап мактаан.
Черле ынчаш чымыш иштиг малчыннарга шуптузунуга белек-селекти сөңнээн.
Бистиң корр.
