Даа кожууннуң 2021 чылда чараш кыстар аразынга «Даңгына» мөөрейи Чадаанада Монгуш Мерген-Херел аттыг культура бажыңынга март 13-те болуп эрткен.
Культураны, чырык өртемчейде каас-чарашты, кижиниң сагыш-сеткилиниң байлаан, ылаңгыя аныяктарның эстетиктиг кижизидилгезин, иштики делегейин байлакшыдып, делгемчидер, сценага, көрүкчүлерге бараан болуп көстүр болгаш анаа-даа амыдыралга бодунуң кижизиг, бөдүүн мөзү-бүдүжүн көргүзер сорулгалыг мөөрейни чылдың-на частың башкы айында, Бүгү-делегейниң херээженнер хүнү Март 8-ке тураскаадып эрттирип турары – Чадаанага, Чөөн-Хемчикке чаңчыл апарган.
Мөөрейге 12 чараш кыстар киришкен. Тыва Республиканың дизайнерлер эвилелиниң кежигүнү, аныяк дизайнер Айдаш Сат, хуу сайгарлыкчы, чылдың-на эртип турар бо мөөрейниң деткикчизи Чадаанада «Буян» садыының эргелекчизи Светлана Монгуш, «Эдегей» танцы болгаш костюм ансамблиниң дефиле башкызы Олчат Монгуш, Чадаананың драма театрының директору Долаана Кара-Сал, Чадаананың драма театрының режиссеру, Тываның культуразының алдарлыг ажылдакчызы Марианна Кара-Сал, республиканың Улусчу чогаадылга төвүнүң башкарыкчы специализи Чаяана Дилгижек, Монгуш Мерген-Херел аттыг төп культура бажыңының директору Саида Бюрбю кирген бедик деңнелдиг жюри байырланчыг чараш каастың мөөрейинге көрүкчүлерден аңгыда, кол шииткекчилер болган. Залдың ортузунга чедир киржикчи кыстарның аянныг кылаштаарынга таарыштырып, белеткеп кылган тускай орукту( подиум) баш бурунгаар белеткээнин көрген кижи мен.
Мөөрейниң программазында: тыва национал хепти көргүзери; национал хевирге даараан аныяктарның амгы үеге дүгжүр хевин бараалгадыры; салым-чаяанныын уран чүүлдүң аңгы-аңгы хевири-биле илередири; дурт-сынын көргүзери; кежээки платьелиг, хөгжүм үделгези, көрүкчүлерниң көрүжү-биле чергелешир кылаштаар аянны киирген. Эрткен чылдарда-даа мөөрейлер көрүкчүлерниң сагыш-сеткилин доюлдуруп турганын айтып каайн...
Күштүг хаттың салдарындан сайгылгаан чырыы өже-даа бээрге, шимчедикчи күжү-биле электри чырыын кыпсып, чараш кыстарның мөөрейи бедик деңнелге эрткен.
«Хөлде салдаан чоргаар кас дег эрткилээрге» деп Александр Даржайның шүлүүнде одуругларында дег, мөөрейниң түңнелинде «Чойган сынныг даңгына» деп атка Чадаанадан Арыяа Куулар; «Уран чүүлчү даңгына» деп атка Теве-Хаядан Саая Айдысмаа, «Мөңгүн даңгынага» – Ариадна Монгуш; «Алдын даңгынага» Чадаананың М.Мерген-Херел аттыг төп культура бажыңындан Айза Куулар, Чыраа-Бажындан «Тоолчургу даңгына» атка Чойгана Ооржак төлептиг болганнар. «Идепкейлиг киржилге» дээш тускай шаңналдарны Баян-Таладан Олча Кууларга, Чадаанада Тываның технологтуг техникумунуң сургуулу Изольда Ондар, Хөндергейден Чимизин Ооржак, Бажың-Алаактан Сайлык Ооржак ап, шаңнатканнар.
Тергииннер «Ай херелдиг Даңгына» бедик атты Хайыракандан Шуру Кууларга, «Хүн херелдиг даңгына» бедик атты Чадаананың №2 ортумак школазындан Александра Сатка тывыскан. 2021 чылда «Даа кожууннуң даңгыназы» бедик атка Ийме сумузунуң чараш кызы Буяна Монгуш төлептиг болган.
Вячеслав МОНГУШ. "Чаа орук" солуннуң кол редактору.
