Хоойлуга дүүшпес ёзу-биле арага-дары, спирт холуксаалыг продукцияны өске региондан дажыглап сөөрткен ийи кижини Барыын-Хемчиктиӊ район суду шииткен.
2020 чылдыӊ февраль 21-де 10 шак үезинде «Ак-Довурак-Абакан» оруунуӊ 48 дугаар километринге полиция ажылдакчылары «Исудзу Форвард» маркалыг автомобильди доктааткан. Транспорт чүүлүнүӊ кузовун хынап тургаш, оон 5 литр ишкир 172 саваларда — шупту 860 литр спирт холуксаалыг суук чүүлдү, 560 шил арага аймаан хавырган.
Суук чүүлдүӊ 95,5 хуузу этилдиг спирт дээрзин экспертиза тодараткан. Ол бүгүнүӊ ниити өртээ 567 371 рубль болган.
Арага-дары аймаан автомашиназынга чүдүрүп алгаш чораан ийи кижиниӊ кайызы-даа хуу сайгарлыкчы эвес, арага аймаан садар чөпшээрели безин чок болган.
Хакас Республиканыӊ Абакан хоорайдан спирт холуксаалыг продукцияны садып алгаш, Ак-Довурак хоорайга улаштыр садып-сааргаш, акша-хөреӊги киирип алырын бодап турганнар.
Оларныӊ РФ-тиӊ Кеземче дүрүмнүӊ 171.3 чүүлүнүӊ 1-ги кезээнде көрдүнген кем-херекти үүлгеткени илерээн. Тодаргайлаарга, этилдиг спирттиг, алкогольдуг болгаш спирт холуксаалыг продукцияны чогуур чөпшээрели чокка, садып-саарары-биле дажыглап чорааны дээш буруудаан.
Кеземче херээн Россияныӊ ИХЯ-ныӊ «Барыын-Хемчик» районнар аразында килдистиӊ ажылдакчылары истээн.
Тыва Республиканыӊ Барыын-Хемчик район суду херекти алыс ужуру-биле сайгарып көргеш, арага аймаан өске региондан дажыглап сөөртүп чораан кижи бүрүзү ийи-ийи миллион рубль төлээр кылдыр шиитпирлээн.
Тываныӊ ИХЯ-ныӊ парлалга албаны.
Р.ДЕМЧИК очулдурган.
