Бүгү-делегейниң кадык-камгалал организациязының дыңнадып турары-биле, Мурнуу Африка Республикага тывылгаш, өске чурттарже база тарап эгелээн коронавирустуң «омикрон» дээр хевиринден амдыызында өлген аарыг улус бүрүткетпээн болуп турар.
СПИД аараан улус аразынга кончуг дүрген тараар коронавирустуң «омикрон» хевири МАР-же даштыкыдан келген туристер болгаш МАР-ның даштыкыже чоруп турар хамаатыларын таварыштыр дүрген тараачалы-биле кончуг айыылдыг апарган.
Мурнуу Африка Республикада СПИД деп база-ла хамчыктыг аарыгдан 6 миллион кижи аарып турарын чурттуң Кадык камгалал яамызы бадыткап турар. Ол дээрге МАР-ның назы-хар четкен чурттакчыларының 10 хуузу болуп турары кончуг дүвүренчиг.
«Омикрон» МАР-да СПИД аараан улус аразынга 100 хуу тарай бээр болза, хамчыктыг аарыгдан аараан улус саны 6 сая ажа бээри коргунчуг.
Эрткен неделяда Мурнуу Африка Республикаже туристеп чораан 2 бөлүк 100 ажыг туристер Москваже чанып келгеннер. Оларны Москва чанында санаторийде кылган обсерваторда аңгылаан. Ол санаторийде эмчилерден аңгыда, кымны-даа үндүрбейн, ынаар кымны-даа киирбейн турар.
МАР-дан келген туристер аразында 10 кижи коронавирустан аарааны илерээн. Оларның ийизи коронавирустуң чаа тывылган «омикрон» дээр хевиринден аараан деп тодаргай тургускан. Артканнарының анализтерин катап база хынап турар.
Бөмбүрзектиң өске талазында Мурнуу Африка Республика бистиң чуртувустан оранчок ырак-даа болза, аңаа тывылган коронавирустуң чаа хевири «омикрон» Россияда база чедип келгени ол.
Россияда коронавируска удур тарып турар вакциналар «омикронга» удур база дээштиг деп россий вакциналарның бүдүрүкчүлери санап турар. Херек апаар болза, «омикронга» удур тускай вакцинаны кыска үе иштинде бүдүрүп, үндүрүп эгелээрин олар дыңнадып турар.
Эртине АРАКЧАА.
#Коронавирус #Омикрон #Мурнууафрика #Тыва #Тува #Шынсолун #Тывадыл #Тывамедээ #Tuva #Shyntuva
