Тываныӊ Баштыӊы Владислав Ховалыг неделя санында болур Аппарат хуралынга республиканыӊ Чазааныӊ чаа кежигүннерин таныштырган.
Россия Федерациязыныӊ өөредилгезиниӊ хүндүлүг ажылдакчызы Елена Васильевна Хардикованы ТР-ниӊ Чазак Даргазыныӊ социал политика айтырыгларыныӊ талазы-биле оралакчызынга томуйлаан. Ол социал политика блогун – Кадык камгалал, Өөредилге, Күш-ажыл болгаш социал политика яамыларыныӊ база эртем болгаш аныяктар ажыл-херектериниӊ талазы-биле агентилелдерниӊ ажылын уштап баштаар.
Елена Хардикова — удуртукчу албан-дужаалдарга ажылдап чораан болгаш социал-политика талазы-биле республикада арга-дуржулгалыг кижилерниӊ бирээзи. Орус дыл болгаш литература эртемин 26 чыл иштинде башкылаан, Кызылдыӊ дугаары 11, 12 школаларынга директорнуӊ кижизидилге ажылыныӊ талазы-биле оралакчызы турган. Тыва Республиканыӊ Өөредилге болгаш эртем яамызыныӊ оралакчы сайыды, орус дыл талазы-биле күрүне инспектору, РФ-тиӊ Камгалал яамызыныӊ №74/106 «Сказка» уруглар сады» федералдыг казна албан чериниӊ кижизидилге болгаш методиктиг ажылыныӊ талазы-биле эргелекчизинге ажылдаан.
«Россия Федерациязыныӊ Өөредилгезиниӊ хүндүлүг ажылдакчызы» деп шаӊналдыӊ эдилекчизи.
Р. Демчик белеткээн.
#Тываныңчазаа #Социалполитика #Чазаккежигүнү #Тыва #Тува #Шынсолун #Тывадыл #Тывамедээ #Tuva #Shyntuva
