Тывада ковидке удур QR-паспорт бар болза, хөй-ниити чемненилге черлерин 23.00 шакка чедир ажылдап болурун чөпшээрээн. Албан черлери дыштанып келгеннерниң QR-кодтарын хынаар ужурлуг. Залда олуттарның чүгле 50 хуузу долу болур ужурлуг дээрзин республиканың экономиктиг хөгжүлде болгаш үлетпүр сайыдының оралакчызы Эва Даваа-Самбуу тайылбырлаан.
Улуг банкет залдарынче 100-тен хөй кижи кирбес. Ниитизи-биле Тываның девискээринде 65 хөй-ниити чемненилге черлери QR-паспорттарны алган, оларның хөй кезии Кызылда. Хөй-ниити чемненилге чериниң девискээринге массалыг хемчеглер эрттирерин хораан.
Шупту негелделер күүсеттинип турарын Чазактың тургускан комиссиязы шыңгыызы-биле хайгаараар.
Сагындырып каалы, QR-паспорттарны алыр чурумун база республикада коронавируска удур коллективтиг иммунитеди бадыткаттынган албан черлериниң аразынче киргенин мойбизнес17.рф сайтызындан көрүп болур.
Хөй-ниити чемненилге черлериниң төлээлери ону долдургаш чорудары албан. Аңаа шупту ажылдакчыларның ат, фамилия, адазының адын болгаш тарыткан хүнүн айтыр ужурлуг.
QR-паспорттарны алган кафе, рестораннар ону келген улуска көскү кылдыр азып алыр ужурлуг.
Тываның Баштыңының Чарлыын күүсетпээни дээш, Росхереглелхайгаарал албан черин хаарынга чедир торгаар.
Чыжыргана СААЯ белеткээн.
#Коронавирус #Кызыгаарлаашкыннар #Хөй_ниитичемненилгечерлери #Тыва #Тува #Шынсолун #Тывадыл #Тывамедээ #Tuva #Shyntuva
