Республиканың школалары чаа өөредилге чылын сентябрь 1-де эгелээр. «Школаже белеткениринге дузалаш!» ачы-буян чедирер акцияны кожуун, суурлар эрттирип эгелей берген.
Хөй уругларлыг өг-бүлелерге, амыдырал деңгели хирелиг улустарга үргүлчү дузалаар ужурлуг чоннуң чаагай чаңчылын уламчылап чоруур акция чылдың-на болуп турар. Тыва Республиканың «Чамдык категорияның хамаатыларынга күрүнениң социал дузазының дугайында» Хоойлузунга дүүштүр, бо ачы-буянныг акцияны эрттирериниң дугайында ТР-ниң Айтыышкынын июль 24-те үндүрген.
Ачы-буянныг акцияга күзелдиг сайгарлыкчылар, бизнесменнер, шыдалдыг хамаатылар-даа, албан черлери, хөй-ниити организациялары-даа киржип болур. А оларның буянныг сеткилинден берген идик-хевин, өөредилге херекселдерин, оон-даа өске социал дузаламчызын хүлээп алыр пунктуларны ТР-ниң Күш-ажыл болгаш социал политика яамызы организастааш, сорулгазынга дүүштүр хуваар ажылды хандырар.
«Школаже белеткениринге дузалаш!» фестиваль-ярмарка тус-тус черлерге бо айның сөөлгү хүннеринде болур. Ачы-буян чедирер акция сентябрь 25-ке чедир уламчылаар.
Бистиң корр.
