Эрткен неделяда Россияның прокуратуразының 300 чылдаан юбилейинге тураскааткан байырлыг хемчеглер үезинде Тываның Виктор Көк-оол аттыг Национал театрынга эрткен чылын болуп эрткен шыдыраа маргылдаазының тиилекчилерин шаңнап-мактаан.
Бүгү делегейниң шыдыраачылары онлайн ойнап турар lichess.org сайтта 2020 чылда ажыттынган «Тува-запад» шыдыраа клувунга (тургузукчузу болгаш башкарыкчызы Арат Ондар, Чадаана) Россияның Прокуратуразының тургустунганындан бээр 300 чылдаанынга тураскааткан онлайн шыдыраа маргылдаазы 2021 чылдың сентябрь 25-те болган. Аңаа 82 аңгы-аңгы хар-назылыг шыдыраачылар киришкен.
ТР-ниң прокурорунуң оралакчызы Ольга Монгуш онлайн шыдыраа маргылдаазынга бөлүк аайы-биле тиилээн болгаш шаңналдыг чер алган шыдыраачыларга алдын, мөңгүн, хүлер медальдарны, дипломнарны, өртектиг белектерни болгаш акша шаңналдарын байырлыг байдалга тывыскан. Бөлүктерге чемпион болган тиилекчилер «Россия Федерациязының 300 чылдаанынга тураскааткан онлайн шыдыраа маргылдаазы» деп сиилбип бижээн кубоктарны база чаалап алганнар.
12 харга чедир бичии оолдар аразынга Кызылдың 2 дугаар школазының 3 «Д» клазының өөреникчизи Начын Чамзы 1-ги черни алган.
Республиканың хөй дакпыр чемпиону, шыдыраага баштайгы тыва ФИДЕ мастери (2008 чылда күүсеткен) Валерия Кууларның оглу, Кызылдың 15 дугаар лицейиниң 5 «Б» клазының өөреникчизи Александр Куулар 2 дугаар черге төлептиг болган. Александрның кырган-ачазы Валерий Николаевич Куулар база шыдыраага республика чемпиону чораан, ам хоочуннар аразынче кирген-даа болза, Тываның шыырак шыдыраачыларының аразында хевээр.
Кызылдың президентиниң кадет училищезиниң (КПКУ) кижизиттирикчизи, 5 «А» класстың кадеди Александр Тарначы бо бөлүкке 3 дугаар болган.
12 харга чедир бичии уруглар аразынга республиканың лицей-интернадының 5 «Б» клазының өөреникчизи Бадма Монгуш чемпионнаан. Кызылдың 1 дугаар школазының 5 «А» клазының өөреникчизи Намдолмаа Ховалыг мөңгүн медальдың эдилекчизи болган. 3-кү черни Долгар Оңгай-оол чаалап алган (Кызылдың 1 дугаар школазының 4 «З» клазы).
17 харга чедир элээди оолдар аразынга Анзат Оюн чемпион атка төлептиг болган (КПКУ-нуң 8 «А» клазы). Новосибирск хоорайның 1 дугаар школазының 10 «А» клазында өөренип турар Кежик Монгуш бо удаада 2 дугаарлап каан. Красноярскиниң медицина университединиң студентизи (1-ги курс) апарган Сайын-Доржу Хомушку хүлер медальды чаалап алган.
Чидиг демисел 17 харга чедир элээди уруглар аразынга болган. Түңнелинде, Арыяа Хоюр-оол (КПКУ-нуң 9 «В» клазы) чемпионнаан. Кызылдың 15 дугаар лицейиниң 9 «А» клазының өөреникчизи Шуру Ондар 2 дугаар черни ээлээн. Кызыл кожууннуң Сукпак школазының 11 «А» клазының өөреникчизи Динара Хомушку 3 дугаар черге төлептиг болган.
Эрткен маргылдаага хоочуннар база идепкейлиг киришкенин демдеглээр апаар. Оларның аразынга төрээн кожууну Улуг-Хемниң адын камгалап киришкен Мерген Кыргысович Анай-оол чемпион болган. Өвүрнүң төлээзи Степан Кенденович Түлүш 2 дугаар черни бүзүрелдии-биле чаалап алган. Чөөн-Хемчик кожуундан Аян-оол Оолакович Дүлүш 3 дугаар чер алгаш төрээн кожуунунуң адын база сыкпаан.
Россияның прокуратуразының 300 чылдаанынга тураскааткан онлайн шыдыраа маргылдаазын билдилиг организастап, шииткеп эрттирген Арат Даш-оолович Ондарны (Чөөн-Хемчик) база Валерий Николаевич Кууларны (Өвүр) тускай шаңнап-мактаан.
Россияның прокуратуразының 300 харлаан юбилейин уткуштур онлайн шыдыраа маргылдаазын организастаарынга Тываның хөй дакпыр чемпиону, шыдыраага баштайгы ФИДЕ мастери, Россияның прокуратура ажылдакчыларының аразынга 5 дакпыр чемпиону, прокурор Валерия Валерьевна Куулар улуг үлүг-хуузун киирген. База ол ышкаш шыдыраа спортун болгаш чаш ажы-төлүвүс биле хоочуннарны деткип чоруур ТР-ниң прокурору Сергей Николаевич Дябкинге улуг-биче шыдыраачылар улуу-биле четтиргенин илередип турарлар.
Мерген КЫРГЫС белеткээн.
