Тываның Баштыңы Владислав Ховалыг эртемден Мира Бавуу-Сюрюн-биле ужурашканын социал четкиде бодунуң арынынга демдеглеп бижээн.
- Тыва дыл хүнүнүң бүдүүзүнде филология эртемнериниң доктору, тыва дылдың билдингир шинчилекчизи Мира Викторовна Бавуу-Сюрюн-биле ужуражып, дыка хөй айтырыгларны көдүрүп, солун чугааны кылдывыс.
Төрээн дылывыс салым-чолу дээш сагыш човаашкынывыс, келир салгалывыс тыва дылын билир кылдыр өөредир дээн бодалдарывыс дөмей болду. Маңаа өөредилге дептерлерин парлаарындан эгелээш, телевидениеге, радиога, интернет шөлүнге тускай дамчыдылгаларны үндүреринге чедир, ниити ажылды чорудар херек.
Чоннуң тускайлаң культуразының камгалакчылары болур эртемденнерниң төрээн дылывысты кадагалап арттырарынче угланган бүгү-ле күжениишкиннерин деткиир бис. Ооң-биле чергелештир ниитилелге эртем каттыжылгаларының салдар-хамаарылгазын көдүрбүшаан, эрге-чагырга органнары эгин кожа ажылдаар ужурлуг. Эртем талазы-биле агентилел тургузар дээн бистиң шиитпиривисти Мира Викторовна деткиди. Бистиң хүндүлүг эртемденнеривистиң ажылдаар аңгы тускай чери республиканың социал-экономиктиг хөгжүлдезинге база чон болуп арттарывыска хамааржыр чугула айтырыгларны хандыр шинчилээринге бүзүрээр мен.
