Бөгүн, январь 24-те, ТР-ниң Кадык камгалал яамызынга парлалга конференциязы болуп эрткен. Аңаа ук яамының оралакчы сайыды Марианна Куулар биле яамының штаттан дашкаар кол инфекционист эмчизи Чечек Ондар республика девискээринде эпидбайдал дугайында тодаргай медээни берген.
ПОЛИКЛИНИКАЛАРДА НИИТИ ЭМНЭЭШКИННИ ТҮР КАДА СОКСАТКАН
“Бо хүннүң байдалы–биле алырга, республика девискээринде чаңгыс хонук дургузунда 252 кижи коронавирустан аарып турар дээрзин лабораторлуг шинчилелдер бадыткаан. Оларның иштинде 14 кижиде “омикрон” штаммы илереттинген. Хүнден-хүнче аарып турар улустуң саны көвүдеп турарын барымдаалааш, аарыгны чавырылдырар сорулга-биле эмчилер баш бурунгаар хемчеглерни ап турар. Ол дээрге республиканың кол эмнелгелеринде ниити план ёзугаар эмнээшкинни (стационарлыг болгаш амбулаторлуг) түр када соксаткан. Аңаа дараазында эмнелгелер хамааржыр:
- Республика поликлиниказы;
- Кызыл хоорайның поликлиниказы;
- Республиканың уруглар эмнелгези;
- Кызыл кожууннуң төп эмнелгези.
Хоочураан аарыглыг улуска, 60 хардан өрү назылыгларга болгаш бичии уругларга эмчи бригадалары бажыңнарынга эмчи дузазын чедирер"- деп, эмчи чугаалаан.
"ОМИКРОН" ШТАММЫ ЧЫПШЫНЫЫЧАЛ
План ёзугаар ниити эмнээшкинни түр када соксадып турарының кол чылдагааны - коронавирустуң “дельта” штаммындан “омикрон” штаммы 5-7 катап чыпшыныычал, хөй кижи аразынга дүрген тараары болуп турар дээрзин оралакчы сайыт Марианна Девин-ооловна база катап дыңнаткан.
Ол ышкаш аарыг улус чыдар орун фондузун 1070 чедир улгаттырган.
Улуг-Хем кожуунда- 40, Барыын-Хемчик кожуунда – 40, Кызыл кожуунда- 40.
План ёзугаар албан эртер диспансерзацияны база түр када соксаткан, а чолаачының шынзылгазын алырынга херек эмчиниң документилерин бээрин уламчылап турар.
Дүрген эмчи дузазын чедирер станцияда эмчи бригадаларын 20 чедир көвүдеткен. Колл-төптерде 122 дугаарлыг изиг шугум телефонунда операторларның санын байдалды көрүп тургаш, херек болза, немээр.
СТАЦИОНАР ЭМНЭЭШКИННИ КЫМНАР АЛЫР?
Ковид-19-тан аарып турар улуска хамаарыштыр кандыг улусту эмчиге чыттырып эмнээр, а амбулаторлуг эмнээшкинге кандыг улусту хамаарыштырып болурунуң дугайында ТР-ниң Кадык камгалал яамызының штаттан дашкаар кол инфекционист эмчизи Чечек Ондар тодаргай тайылбырны берген:
- Бир дугаарында стационарлыг эмнээшкинни эң-не берге байдалда аарып турар улус болгаш хоочураан аарыглыг улус, 60 хардан өрү назылыг улус алыр дээрзин номативтиг документиде ылавылап айыткан. Ол ышкаш доктаамал хөй-ниитиниң чуртталга черлери - кыргыннар бажыңы, студентилерниң болгаш өске-даа ниити чуртталга бажыңнары, аалчылар бажыңында чурттап турар улусту эмчиге чыттырып эмнээр ужурлуг. Амбулаторлуг эмнээшкинге вакцинация эрткенден бээр алды ай четпээн болгаш ол үениң дургузунда коронавирустан аарып каапкан улус хамааржыр - деп, эмчи чугаалаан.
Ковид- 19-тан аарып турар улус чанында чурттап турар, харылзаалыг-даа болза, бир эвес кроронавируска удур тарыттырып алган болза, ындыг улусту албан-биле аңгылавас дугайында санитар-эпидемиологтуг дүрүмде айтып каанын эмчилер сагындырган.
АРТЫК ДҮВҮРЕЛ - БУТ ЧОВАА
Бо хүннерде эмнелгелерде анализ дужаар дээш хөй кижи чыглып турары, аарыгны улам өөскүдериниң айыылын тургузуп турар деп, эмчилер чугаалаан. Ол хөй улус херек кырында кандыг улус ПЦР анализти дужаар, кандыг улус дужаавас дээрзин эки билбейн турар. Хенертен коронавирустан аарып турар улустуң саны көвүдеп эгелээрге, чон артык дүвүрелди оттуруп турар.
Билип алыры чугула чүүл:
- ПЦР анализин долузу-биле коронавируска удур тарытканындан бээр алды ай эртпээн, аарыгның кол шынарлары көзүлбейн турар улус дужаавас ужурлуг дээрзин эмчилер дыңнаткан. Ол ышкаш Тывадан дашкаар сургакчылап чорааш, чанып келген ажылдакчыларындан удуртукчулар ПЦР анализин дужаарын негевес ужурлуг: а) бир эвес ол ажылдакчы коронавируска удур тарыдып алган болза, б) оон бээр алды ай эртпээн болза; в) аарыгның шынарлары илереттинмейн турар болза.
Ынчангаш артык дүвүреп, аай-дедир эмнелгелер аразынга халыыр мурнунда, үстүнде чүүлдү билип алыры артык эвес.
Бо хүннүң байдалы-биле коронавирустан аарып турар амбулаторлуг эмнээшкин ап турар болгаш эмчиде чыдар улустуң саны ниитизи-биле 3489 четкен. Оларның иштинде бичии уруглар- 1251 кижи.
Аарып турар эмчилерниң болгаш ортумак эмчи составының ажылдакчылары, эмчи сестраларының саны 100 ашкан.
Коронавируска удур вакцина республикада чедер.
Санитар-эпидемиологтуг дүрүмнерни хажытпайн, бодувусту болгаш чоок улузувусту камнаалыңар. Кадык нация-республиканың келир үези.
К. Монгуш
