Россияның көдээ ажыл-агый сайыды Дмитрий Патрушев Тываның агроүлетпүр комплекизиниң шапкын хөгжүдер программазын деткээн. Республиканың баштыңы Владислав Ховалыг Москвага сайыт-биле ужурашкан соонда, социал четкилерде бодунуң арынында ооң дугайында бижээн.
«Тыва – аграрлыг регион. Чурттакчы чоннуң чартык кезии суурларда чурттап турар. Ынчангаш көдээ ажыл-агыйын хөгжүдүп, ооң экономиктиг талазын катап тургузары эргежок чугула. Республика чазааның бир мурнады боттандырар ажыл угланыышкыны ам ол. Тываның агроүлетпүр комплекизиниң дүрген хөгжүлде программазын ажылдап кылган бис. Бөгүн Москвага ужаражылга үезинде, Россияның көдээ ажыл-агый сайыды Дмитрий Николаевич Патрушев программаны деткээн. Ол дээрге, бир дугаарында республиканың көдээ ишчилерин деткээни-дир” – деп ол бижээн.
Республиканың чурттакчы чонунуң 46 хуузу көдээ черлерде чурттап турар болгаш Тывага аграрлыг комплекстиң хөгжүлдези стратегтиг ужур-уткалыг. Тываның чонунуң чартык кезии мал-маганы тудуп турарындан, көдээниң амыдырал деңнели ниитизи-биле оон дыка хамааржыр.
Тываның Чазааның 2022-2026 чылдарда республиканың агроүлетпүр комплекизин дүрген хөгжүдер программазы инновациялыг биотехнология шиитпирлерге база чаа технологияларга үндезилеттинген. Ооң-биле чергелештир болбаазырадылга күчүзүн улгаттырбышаан, көдээ ажыл-агый бүдүрүлгезин өстүрери көрдүнген. 2026 чылда республикада бүдүрген сүттүң 100 хуузу, дүктүң 100 хуузу, эъттиң 50 хуузун болбаазыраттынар ужурлуг.
Тываның агроүлетпүр адырының курлавырлары амгы үеде безин улуг: республиканың АҮК бо хүнде 6 млрд рубльдиң продукциязын берип турар болза, ону 18 млрд рубль чедирип болур арга бар. Программа боттанылгазының түңнелинде, «Кызыл - Курагино» демир-орук тудар төлевилелди тургускан соонда, ажыглаттынмаан 5600 ажыг ажылчын олуттар тургустунар.
Дмитрием Патрушев-биле ужурашкан соонда, программаны федералдыг ведомствонуң специалистери-биле кады катап көөрүн Тываның баштыңы Владислав Ховалыг чугаалаан. Беш чыл дургузунда ол программаны боттандырарынга 17 млрд ажыг рубль хемчээлдиг саң-хөө херек, ооң иштинде федералдыг бюджеттен – 9 млрд рубль, республика бюджединден - 1 хире млрд, бюджеттен даштаар дөстерден – 7,5 млрд рубльди хаара тудар. Программаны бадылаптар болза, ооң акшаландырыышкынының бүгү деңнелдер дөстери тодараттына бээр.
Ажылдар уламчылап турар. Ай эгезинде, РФ-тиң Көдээ ажыл-агый яамызының департаментилер удуртукчулары-биле сайыттың бирги орлакчызы Джамбулат Хизирович Хатуов Тывага келир. Делегация тус черниң бараан бүдүрүкчүлери-биле дорт ужуражып, оларның айтырыгларын өөренип, оон-даа ыңай олар-биле ажылдаарынче Россияның көдээ ажыл-агый адырында улуг инвесторларны хаара тударын көөр.
ТР-ниң Чазааның сайтызындан медээ.
Чурукту интернеттен алган.
