Шериг албанындан халашкан ТШО киржикчилери Россияның Социал фондузунуң ТР-де салбырындан төлевир чок путевкаларны ап турар. Дайын хоочуннарынга бедик технологияларлыг дериг-херекселдер-биле чүмнеттинген 12 тускай катап тургустунулга төптери бар.
2026 чылда Социал фондунуң шак ындыг төптеринге ТШО-га киржип чораан 100 ажыг чаңгыс чер чурттугларывыс эмнээшкинни эрткен. Олар колдуунда Хакасияда “Туманный” төвүн шилип алырлар. Эң-не хереглелдиг төптерге Анапада “Кристалл” база Тюменьде “Тараскуль” хамааржыр.
Билдириишкинни Социал фондунуң хүлээп алыышкын албанынга, Хөй албан-хүлээлгелиг төптерге азы Күрүне ачы-дуза порталынга киирип болур. Санаторий-курортче эмнедиринге 070/у азы катап тургустунарынга 057/у хевирниң справказы херек. Ийи ажыл хүнүнүң дургузунда шиитпирни хүлээп алгаш, дараазында хүнде хоочунга ооң түңнелиниң дыңнадыышкынын чорудар.
Ачы-дуза чедирилгезин чедимчелиг болзун дээш, аай-дедир оруунуң өртээниң компенсациязын бээр. Чарыгдалдарын эгидип алырда, билдириишкинни кииргеш, эмненири-биле аай-дедир чораанын бадыткаан документилерин кожуп каар.
Бирги бөлүктүң инвалиди болгаш үделге негеттинип турар ТШО киржикчилериниң үдекчилериниң база оруунуң өртээн, төпке чурттаар, чемненир акшазын төлеп бээр дээрзин Социал фондунуң ТР-де салбырының даргазы Часкал Дараа чугаалаан.
Демир-орук, самолет, автобус азы суг транспорту дээш кандыг-даа хевирниң хөлгелеринге талоннарны бээр.
Немелде медээни Чаңгыс аай контакт-төптен билип ап болур: 8-800-100-00-01. Ол ышкаш Россияның Социал фондузунуң Тывада салбырының специалистериниң ажылчын телефон дугаарларынче база долгап болур: (39422) 9-61-41, 9-61-46.
Медээни болгаш чуруктарны Социал фондунуң Тывада салбырындан алган.
“Шын” №24 2026 чылдың июнь 25
"Шын" солуннуң МАХ-каналынга каттыжыңар: max.ru/join/egenQ...