Республиканың хоорай, суурларының чаагайжыдылгазы дээш Тываның 100 муң ажыг чурттакчылары соңгаан. Хөй-ниити девискээрлерин чаагайжыдар талазы-биле рейтингилиг бадылаашкынга Тыва эң-не идепкейлиг регионнар санынче кирген.
Соңгулданың түңнелинде хамаатыларның бадылааны план езугаар көргүзүглерден 200 ажыг хуу болган. Ол дээрге кандыг-бир объектини чаагайжыдары дээш республиканың 103 муң хире чурттакчызы киришкен — «Чуртаарынга таарымчалыг хоорай хүрээлеңин хевирлээри» федералдыг төлевилел-биле күрүне субсидиязын алырынга чогуур ужурлуг сандан ийи катап көвей болган.
Бо чылын республиканың муниципалдыг тургузугларының идип үндүрген 62 төлевилели бадылаашкынга киришкен. Оларның 30-ни 2024 чылда боттаныр.
Бистиң корр.