Декабрьда Новосибирск хоорайга эртер Сибирь федералдыг округтуң самбога бирги чери болгаш чемпионадынга киржир республиканың чыынды командазын белеткеп эгелээн. Республиканың спортчу белеткел төвү биле регионалдыг Самбо федерацияның «Херел» спорт залынга ийи хүн организастааны маргылдаага Тываның 120 самбо мөгези киришкен.
Маргылдаа ийи аңгы бөлүкке эрткен. 2006 – 2008 чылда төрүттүнген оолдар, уруглар бирги хүнде хүрешкен болза, 2004 — 2006 чылдарда төрүттүнген мөгелер ийиги хүнде тудушкан. Спорттуң бо хевиринге бичии мөгелерниң сонуургалы улгатканын болгаш эки белеткелдиин, чылдан чылче саны көвүдеп турарын самбога тренер башкы Александр Монгуш демдеглээн.
Ийи хүн уламчылаан маргылдааның түңнел салыгларында 70 хире шыырак мөге илереттинген. Тиилекчи оолдар, уруглар Тываның чыынды командазынче кирген.
ТР-ниң Самбо федерациязының дыңнатканы-биле алырга, бөгүн регионда 230 оолдар, уруглар спорттуң бо хевиринде хаара туттунган. Кызылдың, Каа-Хем суурнуң, Чадаана хоорайның база Барыын-Хемчик кожууннуң спортчу школаларында беш профессионал башкылар самбо хүрештиң аргаларынга мөгелерни өөредип турар. Оон аңгыда, Кызылдың дугаары 16 лицейиниң өөреникчилери регион Чазааның деткимчези-биле «Самбону школаларже» төлевилелди боттандырып, 2020 чылда туткан спортчу шөлчүгеште белеткенип турарлар.
Тываның Спорт яамызының планнааны ёзугаар Кызылга база бир самбо спорт залы бо чоокку үеде ажыттынар. Амгы үеде ында септелге ажылдары уламчылап турар.
«Zа самбо» федералдыг партийжи төлевилел Россияга самбону нептередир ажылды эгелээн. Регионнарга самбо кичээлдерин эрттирер тускайжыттынган спортчу залдарны тудар база эде чаартыры көрдүнүп турар.
ТР-ниң Чазааның парлалга албаны
Чуруктарны интернеттен алган.
“Шын” №79 2023 чылдың октябрь 18
