Бо хүннерде чайгы үеде ажы-төлдү ажыктыг дыштанылгаже хаара тудуп турар немелде өөредилге, культура, спорт болгаш социал деткимче албан черлериниң баазазында түр үеде ажыткан дыштанылга төптериниң ийиги сезону ажылын дооскан. Дараазында сезонда 20 муң ажыг уругну хаара тудар. Дыштанылга төптеринде уругларга айыыл чок чоруктуң дүрүмнерин өөредип турар. Ол уругларның бертип-кемдээринге база назы четпээннер аразынга хоойлу-дүрүм үрээр чорукка удур профилактикага дузалаар.
Уругларның дыштанылга төптериниң кол организакчылары – мурнунда чылдарда ышкаш ТР-ниң Өөредилге биле Күш-ажыл болгаш социал политика яамылары. Кол күштү амыдыралы чегей өг-бүлелерниң база тускай шериг операциязының киржикчилериниң ажы-төлүн ажыктыг дыштанылгаже хаара тударынче үндүрүп турар.
Өөредилге яамызы 17 түр үениң дыштанылга төптерин хайгаарап турар. Ол төптерниң ажылы уругларның чогаадыкчы, интеллектуалдыг база спортчу талаларын илередиринче база команда ажылын, лидер шынарларын база хамааты харыысалгазын хевирлээринче угланган.
Ук ведомствонуң сайтызында (https://vk.ru/wall-38636573_58255) муниципалитет бүрүзүнде ажылдап турар дыштанылга төптериниң даңзызын салган.
Бо сезонда Тываның культура албан черлеринде 122 түр үениң дыштанылга төптери ажылдап турар. Июль 19-та ийиги сезон доозулган, сөөлгү үшкү сезон август 1-де ажылын эгелээр. Культура адырының шупту дыштанылга төптери боттары профильдиг угланыышкыннарлыг болгаш тематиктиг планныг.
Бо чылын дыштанылга төптериниң хемчеглери колдуунда Россияның чонунуң чаңгыс деминиң чылынга тураскааткан эртип турар. Ол ышкаш кол кичээнгейни айыыл чок чорук айтырыгларынче угландырган. Шимченгир оюннар, викториналар болгаш мөөрейлер эрттирип тургаш, уругларга сугга, оруктарга, походтар үезинде азы хенертен айыылга таварышканда, бодун канчаар алдынарының чурумунга өөредип турар. Дыштанылга төптериниң долу даңзызын ТР-ниң Культура яамызының социал четкизинден (https://vk.ru/wall-20358661_87912) көрүп болур.
Чайгы кадыкшылга кампаниязының үезинде ТР-ниң Спорт яамызы 30 дыштанылга төптерин организастаан, оларның 10-у «Эзирлер уязы» спорт залдарының баазазында ажылдап турар. Спорт яамызы бо сезонда спортка сонуургалдыг 7-ден 17 хар чедир назылыг 11 муң ажы-төлдү хаара тударын планнап турар. Бо чылын 5 сезонну планнаан. Июль 21-де үшкү сезон доостур, дөрткүзү июль 23-те ажыттынар. Ынчангаш спортка хандыкшылдыг оолдар-уругларга дыштанылга төптеринге бижиттирип алыр үе ам-даа бар-дыр.
Тренерлер кадык амыдыралды суртаалдап, республикада спорттуң тургустунган төөгүзүнүң база хөгжүлдезиниң дугайында, корум-чурум база патриотчу кижизидилгеге профилактика талазы-биле угланыышкынныг чорудуп турар.
ТР-ниң Күш-ажыл болгаш социал политика яамызы бо чайын Чеди-Хөл база Чаа-Хөл кожууннарның Өг-бүлелерге болгаш уругларга социал деткимче төптериниң баазазында дыштанылга төптерин ажыткан. Сезон бүрүзүнде амыдыралы чегей өг-бүлелерниң 100 ажыг ажы-төлүн хаара туткан.
Дыштанылга төптериниң ачызында Тываның школачылары бүдүн чай дургузунда дагдыныкчыларның хайгааралы-биле чаа чүүлдерге өөренип, күш-дамырын сайзырадып база спорт-биле өңнүктежип, солун бөлгүмнерже барып, чогаадыкчы мастер-класстарга, янзы-бүрү мөөрейлерге киржир аргалыг болуп турар деп, кадыкшылга кампаниязын удуртуп турар ТР-ниң Өөредилге яамызы демдеглеп турар.
/ Бистиң корр.
Чурукту ТР-ниң Чазааның парлалга албанындан алган.
“Шын” №28 2026 чылдың июль 23
"Шын" солуннуң МАХ-каналынга каттыжыңар: max.ru/channel_shyn