«Бүгү чүүлдү Тиилелгеже!» деп республика чергелиг акция-биле чыгдынган чүъктү Тываның төлээлери чедирип чорупкан.
Чүъкте үш тепловизор, ийи дизельдиг генератор, дөрт квадрокоптер, он алды радиостанция, дөрт моторлуг хирээ, ийи ноутбук болгаш ийи принтер, ийи хааржак фонарь, дөрт коробка кургаг душ, он чеди глушитель, он машина шывар четки, ийи коробка таакпы болгаш артыш, бежен хааржак ижер суг, суг кудар бежен канистр, үш хааржак резин идикти болгаш «Провод» деп шола аттыг командирниң дилээ-биле белеткээн УАЗ Патриотту база ЛУР-нуң тайбың чурттакчыларынга он тонна аъш-чем аймаа, беш хааржак арыгланыр херекселдер, чеди хааржак канцелярия херекселдери, он сес хааржак ном бар.
20 тонна чүъктүг «Буянныг үүлениң машиназы» деп фура болгаш «УАЗ Патриот» 2023 чылдың август 10-да чедер черинге чеде бээр.
Чүък чедиреринден аңгыда, ТР-ниң делегациязы Свердловск хоорайның болгаш Свердловск облазының администрациязы-биле база Ада-чурттуң Улуг дайынының киржикчилериниң өг-бүлелериниң комитеди болгаш ЛУР-нуң Садыг-саарылга палатазының төлээлери-биле эш-хуу ужуражылганы кылып, келир үеде кады ажылдажылганы чугаалажыр.
Бистиң корр.
"Шын" №59, 2023 чылдың август 9