Тываның Баштыңы Владислав Ховалыг 2025–2027 чылдарда республика бюджединиң дугайында хоойлуга атты салган. Социал четкилерде бодунуң блогунда ону дыңнаткан.
2025 чылда бюджеттиң орулгалыг кезээ 68,7 млрд рубль, чарыгдалдар — 70,4 млрд, а 1,6 млрд ажыг рубль чедишпес түң кылдыр планнаттынган.
Бюджет социал угланыышкынныг кылдыр артканын республика Баштыңы демдеглээн, ооң 62 хуузу азы 43,6 млрд ажыг рубли социал политикаже чарыгдаттынар.
«2025 чылда бюджеттиң социал ужур-дузалыг чарыгдалдарының санында – бюджет адырында ажылдакчыларның күш-ажыл төлевириниң кудуку хемчээли 16,5 хуу өзер (36560-дан 42636 рубль чедир). Оон аңгыда, РФ-тиң Президентизиниң «май» чарлыктарынга даянгаш, бюджет албан черлериниң “чарлыкта” бөлүүнде ажылдакчыларның күш-ажыл төлевирин 6 хууга улгаттырар. Октябрьның 1-ден ону 5,1 хууга база индексастаар».
Владислав Ховалыг келир чылда кол айтырыгларның аразындан бюджет четкизинге чарыгдалдар көвүдээр деп чугаалаан. Ынчалдыр 2025 чылда ажыттынар чеди школаның ажылдакчыларының, ниитизи-биле 1,2 муң кижиниң күш-ажыл төлевирин хандырар.
2025 чылда регионалдыг төлевилелдерниң акшаландырыышкынынче 1 млрд рубльди тускайлаан база дуза кылдыр федералдыг бюджеттен 20 млрд рубльди алыр. Өңнүг металлдар тывыжы болгаш болбаазырадылга адырында инвестиция төлевилелдерин, чиигелделиг ипотека программазын, автомобиль оруктарын база орук чоогунуң инфраструктуразын боттандырарынга субсидиялар көрдүнген.
Декабрьның 13-те Россияның Чазааның Даргазы Михаил Мишустинниң ат салганы республиканың социал-экономиктиг хөгжүлдезиниң чаа бот-тускай программазының хемчеглеринге 1 млрд рубльди 2025 чылда аңгы тускайлаан.
Владислав Ховалыг вице-премьерлерге болгаш сайыттарга бюджет акшалары кандыг айтырыгларны шиитпирлээринче угланырын тайылбырлаар ажылды хүлээндирген. Тываның Баштыңы Дээди Хуралдың депутаттарын ол хуралга каттыжарын дилээн. «Республиканың социал-экономиктиг байдалын экижидеринге бистиң кады ажылывысты чон билген турар ужурлуг» — деп, ол санаан.
Бистиң корр.
“Шын” №98 2024 чылдың декабрь 21