Чайгы үеде куда-дой сезону эгелээрин билир бис. Найыр-дой залдарының ээлери 22 шак соонда шимээн-дааш үндүрбес дугайында Хоойлуну сагып, фейерверк чазылдырарын болдурбазын кызыдар ужурлуг. Чүге дээрге, Хоойлу хажыдыышкыны болган таварылгада, залдың ээлерин торгаалга онаар.
Бо хүннерде Кызылдың мэриязынче бо айтырыг талазы-биле чүс ажыг хомудалдар чондан кирген болуп турар. “22 шак соонда фейерверк чазылдырып турар найыр-дой залдарынче кичээнгейден ап көрүңер! Чамдык улуска – байырлал, өскелерге — уйгу чок дүннер-дир. Ол дааш-шимээнден удуп чыткан уруг-дарыг сырбаңнап оттуп кээр. Ол дээрге чаш улуска аар стресс болуп турар. Ооң соонда, дүне оттуп келген ажы-төлдү оожуктуруп, катап удудуп алыры дыка берге. Бо кайы хамаанчок болуп турар чүүлдерни соксадып көрүңер!” — деп, хомудаан чон бижип турар.
Шак ындыг уткалыг чондан кирген хөй санныг хомудал-бижиктерни кичээнгейге алгаш, Кызылдың чагырга чериниң Административтиг-техниктиг хайгаарал эргелелиниң ажылдакчылары кежээки рейдилерже үнүүшкүннерни кылып, найыр-дой залдарының ээлеринге ужуражып, профилактика ажылын чорудуп турар. Чоок-кавыда чурттакчы бажыңнар турар черге 22 шак соонда дааш-шимээн үндүрбес дугайында Хоойлуга кижи бүрүзү чагырткан турарын, бир эвес ук хоойлуну хажыдар болза, дораан торгаалга онаажырын база катап сагындырып турар.
Эрткен дыштаныр хүннерде мэрия ажылдакчылары «Столичный», «Бай-Сайыр», «Саяны», «Аалчы», «Аристократъ», «Алтеа» болгаш «Алмаз» деп залдарга чедип, хыналданы чоруткан. Чүге дээрге эң-не хөй хомудалдар ол залдарның адында кээп турар.
Мында билзе чогуур чүүл, бир удаа Хоойлу хажыдыышкыны кылган болза, сагындырыгны бээр. Ооң соонда катаптаар болза, дораан административтиг харыысалганы тургускаш, торгаал онаар.
Ол ышкаш найыр-дой залдарының чанында чурттакчыларга шак ындыг байдалдар катаптаттынып турар болза, участок шагдаазын келдиргеш, аңаа хомудал киирип болурун сагындырып турар. Ынчан ол протокол тургускаш, торгаалга онаар эргелиг. Торгаалды чүгле найыр-дой залдарының ээлеринге эвес, а ону организаастаан кижилерге база онаары көрдүнген.
Бир эвес фейерверкти албан чазылдырыксаар болза, 22 шак четпээнде кылырын сүмелеп турар.
Ол ышкаш өгленип турар аныяктарның хоорай иштинге автомашиналыг шимчээшкиннеринге хамаарштыр база негелделер күштелгенин билзе чогуур.
Орук шимчээшкининиң киржикчилеринге сүржүп алган чоруур куда машиналары кончуг улуг шаптараазыннарны бо-ла тургуза бээр. Олар машиназын кайы хамаанчок хары угда медээлээри-биле орук шимчээшкиннеринге озал-ондак айыылын тургузуп болур. Ол дээш база торгаалга онаажып болурун күрүнениң автоинспекция ажылдакчылары сагындырып турар.
Оон аңгыда, куда машиналарының күрүне дугаарының кырындан өске чүүлдер чыпшырып болбас. Ындыг таварылгада, 5000 рубль чедир торгадыр болгаш чолаачының шынзылгазын үш ай дургузунда машина башкарар эрге чок кылдыр хавырып болур. База бир кылып болбас чүүлге, халдып чоруур машина соңгазындан хөрээнге чедир уштунуп алгаш чорууру. Ынчан шак ындыг улус сөөртүп чораан машинаның чолаачызы машина башкарар эргези чок кылдыр шынзылгазын ха-выртканы ол.
Бо бөдүүн дүрүмнерге чагыртып чоруур болза, байырлал-даа эки эртер, артык шүүдел-даа чок болур.
Бистиң корр.
“Шын” №47 2023 чылдың июнь 28