Бо чылын кандыг орук объектилери «Айыыл чок шынарлыг оруктар» национал төлевилелдиң иштинге Тывага туттунарыл дээрзин республиканың Орук-транспорт комплекизиниң яамызы дыңнадып турар.
Ооң медеглээни-биле алырга, дөрт регионалдыг оруктуң участоктарын, Кызылдың чоогунда чурттакчылыг черлерниң үш оруун, ол ышкаш ийи кылымал дериг-херекселди чогуур норма-чижээнче киирер. Ниитизи-биле 29 километр орук шывыын септээр. Ол бүгүге федералдыг бюджеттен 575 сая, регион бюджединден 461 сая рубльди углаар.
Септеттинер оруктарның талазы-биле керээлерни чарган, керээлиг организацияларга «Восток», «Суугу», «Строй-экспресс» болгаш «ДСТ» компанияларны тодараткан. Септелге ажылдары апрель төнчүзүнде эгелээр деп, Орук-транспорт комплекизиниң яамызы медеглеп турар.
Шак ынчалдыр, Хандагайты – Мугур-Аксы автомобиль оруун ийи чара шаап турар Барлык хемни кежилдир көвүрүгге, Кызыл-Мажалык – Аяңгаты автооруунуң Улуг-Аяңгаты хемни кежилдир көвүрүг хевирлиг эртер черниң септелгезин чорудар.
Кызыл – Сарыг-Сеп болгаш Суг-Аксы – Алдан-Маадыр автооруктарынга септелгени кылыр, Кы- зыл – Эрзин – Моол-биле күрүне кызыгаары автооруктуң ийи участогун болур-чогуур шинчиже киирер.
Оон аңгыда, Кызылдың оруктарынга септелге ажылдары база планнаттынган. Чижээлээрге, Колхозная кудумчузунда орук участогун 2 дилиндек турганындан 4 дилиндек кылдыр чаартыр, ооң шывыын эде чадар, а ол ышкаш Колхозная болгаш Каменистая кудумчуларында оруктарны үндезинии-биле септеп-селиир.
/ Бистиң корр.
"Шын" №25 2023 чылдың апрель 8
#Шынсолун #ТываныңЧазаанда #Тыва #Автоорук #АйыылЧокШынарлыгОруктар #ОрукТранспортКомплекизи
29 километр автоорукту септээр
9 апреля 2023
27