2026 чылдың эгезинден тура Республиканың консультация-диагностика төвүнге 2915 Тываның чурттакчызы магнит-резонанстыг томография (МРТ) аргазы-биле бедик технологиялыг диагностиканы эрткен дээрзин Тыва Республиканың Кадык камгалал яамызы дыңнаткан.
Амгы үениң дериг-херексели республиканың чурттакчы чонунга шынарлыг диагностиканы эртип алырынга «Үргүлчүлелдиг болгаш идепкейлиг амыдырал» деп национал төлевилелдиң боттаныышкыны-биле ажылдап турар.
МРТ шинчилел чоруда- ры – эң-не информативтиг бир арга. Ол өске аргаларга бодаарга, баштың болгаш чүн, оорга сөөгүнүң, чүстер болгаш иштики органнар аарыгларын эге чадазында ылап шын илередиптер аргалыг.
МРТ-шинчилелди эмнеп турар эмчизиниң сүмези болгаш ОМС полизи-биле халас эртип ап болур.
Национал төлевилелдерниң шугуму-биле сөөлгү чылдарда регионнуң кадык камгалалында техника хандырылгазы күжениишкинниг чоруп турар. Ооң ачызында чурттакчы чонга бедик технологиялыг эмчи дузазы чедингир апарган. Ам дыка хөй шинчилелдер болгаш процедуралар эртип алыр дээш, Тывадан дашкаар чораан ажыы чок. Республиканың Консультация-диагностика төвүнге РФ-тиң кадык камгалал сайыды Михаил Мурашко Россияның Чазак Даргазы Михаил Мишустин болгаш Тываның Баштыңы Владислав Ховалыг-биле кады чорааш ындыг эки өскерлиишкиннерни демдеглээн. Ооң чугаазы-биле, сөөлгү чылдарда республиканың амбулаторлуг поликлиника звенозунга кадык камгалал адырының ажылынга 700 ажыг амгы үениң дериг-херекселин база 50 хире автомобильди саткан.
Михаил Мишустин төптүң даштыкыга бүдүрген томогравын сонуургап көрген. Премьер-министр кадык камгалал сайыдындан тус черге бүдүрген МРТ аппарадының дугайында айтырган. Ону чогаадырынга Росатом ажылдап турар деп Михаил Мурашко харыылаан. «Билир мен. Росатом кажан аазаан ийик? Ажылын кажан доозар?» — деп, премьер-министр сонуургап айтырарга, «Келир чылын боттуң МРТ-зи турар ужурлуг» — деп, М. Мурашко харыылаан.
Бистиң корр.
Чурукту ТР-ниң Чазааның парлалга албанындан алган.
Шын №30 2026 чылдың август 5
"Шын" солуннуң МАХ-каналынга каттыжыңар: max.ru/channel_shyn