Чаа тудар хөй аал чурттаар бажыңнарда квартиралар шөлүн эвээжетпес хемчеглерни алырын Тываның Баштыңы Владислав Ховалыг республиканың Тудуг яамызынга дааскан.
Октябрьның 5–6 хүннеринде Кызылга эрткен тудуг шуулганының үезинде Кызылда тудуп турар хөй аал чурттаар квартираларның шөлү эвээш дээрзиниң дугайында айтырыг көдүрүлген.
Хөй аал чурттаар бажыңнар төлевилелинде бичии шөлдүг квартиралар санын көвүдедирин тудуг черлери кызыдып турарын элээн каш эксперттер шуулган үезинде дыңнаткан. Ынчангаш квартираларның шөлүнүң хемчээлдери кызырлып бар-ла чыдар. 2023 чылда чаа тудугда эң бичии квартираның шөлү 25 дөрбелчин метр болган.
Республиканың төвү чүгле Кызыл хоорайда бөгүн тудуп турар хөй аал чурттаар 30 ажыг бажыңнарда 1 муң ажыг чаңгыс өрээлдиг квартиралар барын ТР-ниң Тудуг яамызы дыңнаткан. Оларның 300-ү азы үштүң бир кезии Россияда чааскаан чурттап турар кижиге доктааткан кудуку норма – 33 дөрбелчин метрден эвээш шөлдүг.
Чурттакчы чоннуң кол кезииниң хереглелин боттандырары-биле квартираларның шөлүн бичиилеткенин тудугжулар тайылбырлаан. Бүгү чуртта, Тывада база “чаңгыс өрээлге” хереглел, шынап-ла, көвүдээни шын.
Тудуг организацияларының чаа тудугларда квартиралар шөлүн бичеледир дээн чүткүлүн шеглээр хемчеглерни ноябрьга чедир саналдап киирер даалганы Тываның Баштыңы В. Ховалыг республиканың Тудуг яамызынга берген. Тудуг организациялары-биле бир өрээл квартираның шөлү 33 дөрбелчин метрден эвээш эвес болурун айыткан дугуржулганы чарарын көрүп турар. Оон эвээш шөлдүг квартиралыг бажыңнарны тутпас.
ТР-ниң Чазааның парлалга албанының медээзинден.
“Шын” №81 2023 чылдың октябрь 25