Школаларга капиталдыг септелге чорудар федералдыг программаның Тывада боттанылгазы уламчылап турар.
Ооң ачызында 40 өөредилге албан черлери чаарттынган, ниити санның 23 хуузун тургузуп турар. Барык 14 муң чыгыы оолдар, уругларга амгы үениң дериг-херекселдери-биле дериттинген школаларга өөренир арга тургустунган деп, Тываның Баштыңы Владислав Ховалыг бодунуң блогунга бижээн.
«Бистиң Президентивис Владимир Путин ук программаны 2030 чылга чедир узадырын деткээн. Ажы-төл саны көвей республикага бо чугула медээ-дир. Программа суур биле хоорай аразының харылзаазын чоокшуладыр, көдээ черниң ажы-төлүнге хоорайда чажыттарында ышкаш эртем-билигни болгаш өзүлдени чедип алыр аргаларны бээр» — деп, Тываның Баштыңы онзалап демдеглээн.
2024 чылда школаларга капиталдыг септелге программазынче республиканың 6 школазы кирген. «Акшаландырыышкынның ниити түңү 360 сая рубль. Эрзинниң, Тээлиниң, Хөндергейниң, Кызылдың 4 дугаар школаларын, Кызылда дыңнаары кошкак уругларның школа-интернадын, ол ышкаш Кызыл кожууннуң Сукпакта аграр лицейниң оран-савазын чаартыр» — деп, Тываның Баштыңы дыңнаткан.
Бистиң корр.
Чуруктарны интернет четкизинден алган.
“Шын” №15 2024 чылдың февраль 28
