Россияның Социал фондузунуң Тывада салбыры 2026 чылдың эгезинден тура 744 ажылдавайн турар соңгу чүк пенсионерлеринге дыштанылга черлеринче барган оруунуң өртээн эгидип берген. Төлевирлерниң ниити түңү 15,5 сая рубль болган.
Кыдыкы Соңгу чүкте азы аңаа деңнээн регионнарда чурттап чоруур назылап кырааны дээш азы бертик-межел болганы дээш камгаладылга пенсиязы ап турар боорда, ажылдавайн турар пенсионерлер ийи чылда чаңгыс катап дыштанылга черлеринче аай-дедир чораан оруунуң өртээн эгидип ап болур.
Чарыгдалдарны дараазында хевирлерге эгидип ап болур:
а) демир-орук транспортунга дыштанылга черинче баргаш, дедир чанарынга орукка чоруур документилер (тускай талоннар) бээр;
б) пенсионер кижиниң дыштанылга черинге баргаш, дедир чанып келген орук чарыгдалдарының орнун акша кылдыр эгидип бээр.
Соңгу чүктүң пенсионерлери бо ийи хевирниң кайы-бирээзин шилип алыр эргелиг. Бир дугаар таварылгада Социал фонд салбырынга эртежик чеде бергеш, демир-орук транспортун харыылап турар албан черлериниң кассазындан халас билет ап алыр тускай талонну ап алыр. Ийи дугаар таварылгада баштай бодунуң акшазы-биле аай-дедир орук өртээн төлеп чорааш, дыштанып алгаш келгеш, Социал фонд салбырынга чеде бээр. Билдириишкинге орукка чораан документилерин (билеттерин) кожар.
Дыштаныр черге четкеш, дедир чанган орук хөлезининге чарыгдалды дуглаар түң хоойлу ёзугаар транспорттуң хевиринден, категориязындан, таарымчалыг байдалындан хамааржыр деп айтыры чугула. Эгидип бээр компенсация пассажирлер поездизиниң плацкарт вагонунуң өртээнден ашпас ужурлуг. Шак ындыг негелдеге Россияның авиакомпанияларының эконом-класс рейстери, хоорайлар аразында доктаамал чоруп турар автобус рейстери, III категорияның хем транспорту болгаш далай хемезиниң каюталарының IV-V бөлүктери хамааржыр.
Компенсацияны алыры-биле пенсионер кижи Күрүне ачы-дуза порталы дамчыштыр электроннуг билдириишкинни чорудуп болур. Аңаа билеттериниң чуруун азы хоолгазын кожары чугула. Оон аңгыда Социал фондунуң Тывада салбырынга боду чеде берип болур. Хөй хүлээлгелиг төп (МФЦ) азы почта (Россияның почтазы) дамчыштыр база билдириишкинни чорудуп болур.
Соңгу чүктүң пенсионерлериниң аай-дедир дыштанып чораан оруунуң өртээн эгидип алырынга хамаарышкан айтырыглар бар болза, Социал фондунуң регионалдыг 8 800-100-0001 дугаарынче понедельник – четверг хүннеринде 9.00 шактан 18.00 шакка чедир, пятницада 9.00 шактан 16.00 шакка чедир долгап болур.
/ Н. Куулар белеткээн.
Чурукту Россияның Пенсионерлер эвилелиниң регионалдыг салбырының архивинден алган.
Шын №30 2026 чылдың август 5
"Шын" солуннуң МАХ-каналынга каттыжыңар: max.ru/channel_shyn