Амгы үеде Тывада Ада-чурттуң Улуг дайынынга Тиилелгениң 78 чыл оюнга тураскааткан бичии болгаш элээди уруглар аразынга республика чергелиг “Тиилелгениң Салюду” фестивальдың кожуун чергелиг чадазы болуп эртип турар. Мөөрейниң бо чадазы март 17-ге чедир үргүлчүлээр.
Ук фестиваль өөредилге черлериниң уругларның чогаадыкчы коллективтериниң уран чүүл күүселдезиниң деңнелин бедидеринче болгаш сайзырадырынче угланган, чаңчыл ёзугаар республиканың бүгү-ле өөредилге черлериниң 1-ден 11 класска чедир өөреникчилерин хаара тудуп турар культурлуг хемчег болуп турар.
Фестивальдың республика чергелиг чадазы март 23-те Тываның В. Халилов аттыг күрүне филармониязынга болуп эртер. Концерт программазынче хөйнүң ыры, танцы-сам, аянныг номчулга, театр көрүлдези дээш уран чүүлдүң янзы-бүрү жанрлары кирип турар. Өөредилге черлериниң боттарының шилип алганы-биле академиктиг азы улустуң ырларын күүседир хөйнүң ырының күүселдези-биле фестиваль доостур.
Бо чылын республикада фестиваль 11 дугаар болуп эртип турар. Республиканың аңгы-аңгы булуңнарындан 700 ажыг өөреникчи кээп киржир. Фестивальдың тургузукчулары болгаш эрттирикчилери Тыва Республиканың өөредилге болгаш культура яамылары болур.
Бичии болгаш элээди уругларның “Тиилелгениң Салюду” деп фестивальы кижизидилге ажылында чугула рольду ойнап турар. Өзүп олурар салгалдарга чаңчылчаан культура-төөгүлүг чүүлдерниң үндезинин, аңгы-аңгы чылдарда Тыва Арат Республиканың ёзу-чаңчылдарын дамчыдып берип, чер-чуртунга ынакшылын оттуруп, Ада-чурттуң Улуг дайынының чылдарында төөгүлүг сактыышкынны шиңгээдип, кадагалап арттырар.
700 ажыг салым-чаяанныг уругларны хаара тудар.
9 марта 2023
33