Тыва Республиканың Соңгулда комиссиязының даргазы Лариса Андалаева сентябрь 10-да болур соңгулдалар дугайында тайылбырны берген:
– Сентябрь 10-да чаңгыс аай бадылаашкын хүнүнде Тыва Республиканың девискээринге 59 муниципалдыг деңнелге (Ак-Довурак хоорай округунуң база 7 кожуун: Чөөн-Хемчик, Бии-Хем, Сүт-Хөл, Таңды, Улуг-Хем, Чеди-Хөл, Эрзин кожууннарның, Чадаана хоорайның болгаш 50 көдээ суурларның) 621 депутаттың мандадын солуур соңгулдалар болуп эртер.
Бо соңгулдаларда 14 девискээрниң, 95 соңгулда участоктары ажылдаар.
Ниитизи-биле соңгуур эргезин республиканың 79 муңдан хөй хамаатызы идепкейлии-биле ажыглап болур.
Соңгулдага киржири-биле 711 кандидат бүрүткеткен, оларның: “Чаңгыс демниг Россия” партиязындан – 620, РЛДП — 36, РФКП — 12, «Чөптүг Россия» – 3, бодун идип үндүрген – 40 кижи болуп турар.
Ажык-чарлыг чорукту хандырары-биле сентябрь 10-да бүгү девискээр комиссияларынга болгаш соңгулда участоктарының бадылаашкын чорудар оран-саваның иштинге видео-бүрүткелди офлайн байдалга дүн-хүн чок организастаар. Оон аңгыда, соңгулда участоктарынга хөй-ниитиниң хайгааракчылары хаара туттунган болур.
Бо удаада 7 соңгулда участоктарынга соңгукчуларның бадылаан бюллетеньнерин ол-ла дораан электроннуг хевирге санап үндүрүптер комплекстерни ажыглаар.
Август 28-тен тура 693 чедери берге черлерде баш бурунгаар бадылаашкын эгелей берген, ол бадылаашкыннар сентябрь 9-та доостур.
Сентябрь 5-ке чедир 1085 соңгукчу баш бурунгаар хамааты эргезин идепкейжи ажыглап, бадылаан.
Баш бурунгаар бадылаашкын Чаа-Хөл кожуунда доозулган. Ында 204 соңгукчу бодунуң үнүн берип, бадылаан. Ол ышкаш Бай-Тайганың Кара-Хөлде, Бии-Хемниң Севиде, Эрзинниң Качыкта баш бурунгаар бадылаашкын доозулган. Ниитизи-биле ол суурларның 825 соңгукчузу бадылаашкынга идепкейлиг киришкен.
Сентябрь 10-да бадылаашкын эртенгиниң 8.00 шактан 20.00 шакка чедир уламчылаар.
Карина МОНГУШ.
Буян ООРЖАКТЫҢ тырттырган чуруу.
№66 «Шын» 2023 чылдың сентябрь 6