1965 чылдың август 25-те Алдан-Маадыр 8 чыл школазынга комсомолчу путёвка-биле вожатыйлап ажылдап эгелээн мен. Кожууннуң 7 школазының аразында Алдан-Маадыр 8 чыл школазының пионер ажылы мурнуку одуругларга турган. Дружинавыс ады “Олег Кошевой”, ооң кежигүннери 8 эки өөредилгелиг, үлегерлиг өөреникчи турган. Дружинаның даргазы Ирина Делег-ооловна Ооржак, оралакчызы – Валентина Шыдыраевна, горн этсир, барабан соктаар, тук тудар өөреникчилер база турган.
Дружина совединиң кежигүннерин отряд бүрүзүнге быжыглаар. Отряд бүрүзү клазының эжииниң кырынга отрядының девизин парлааш, азып алыр. Ынчан 8 чыл школазының 8-ки классчылары Шулуун, Зоя, Сендаш, Сендиң, Бора-Даш, Аля, Аля М. дээш оон-даа өскелер. 8 класс комсомолчуларның отряд бүрүзүнге комсомолчу вожатыйларны быжыглаан. Партия хуралы болурга, пионерлер байыр чедирип, сөс алыр турган. Отрядтар, тимуржу командалар суурнуң кудумчуларын хуваажып алгаш, аштап турган. Чыыштарже чалаткан хүндүлүг, эки үлегерлиг хоочуннар пионерлерниң кызыл галстуктарын баглап, чагыг-сүмезин кадып турган.
Пионерлер отрядынга киирген кежигүннеривис: алдарлыг суггатчы Алдын-оол Кылаңмаевич Кызыл-оол, чылгычы Оюу Сегбелдеевич Ооржак, повар Ыңаак Чүсүкпеновна Ооржак база суурнуң Маадыр иелери.
Кызылга вожатый башкылар семинарынга бир ай өөредир эки үе турган. Кожууннуң школаларының бүгү вожатыйлары найысылалга билиин бедидип, бир ай өөренгеш, Ак-Довурак болгаш Хову-Аксынче экскурсиялаан бис.
Вожатыйларның ажылын Чадаананың райком комсомол чери харыылаар турган. Бир хүн Чадаанага семинарга чеде бээримге, мээң чуруумну хүндүлел самбыразында азып каан, аңаа шаңнал-мактал база алган мен. Ынчан комсомолдар пионерлерниң ажылын шыңгыы хынаар турган.
1965 чылдан пионер организациязы дүшкүжеге чедир ажылдаан мен. Ынчан 22 харлыг турган мен. Амгы үеде 80 харлыг мен. Школаларга ажылдаан стажым 40 чыл. Алдан-Маадырга Херээженнер чөвүлелин удуртуп, республика деңнелинге чедир ажылдаан мен. Дружинага 15 кижи ажылдап турдувус.
Херээженнер чөвүлелинге эки ажылым дээш Москвадан ийи медаль алдым. РФ-тиң Улус өөредилгезиниң хүндүлүг башкызы, ТР-ниң Өөредилге яамызындан медаль, Ие медальдарым – 3, ТАР-ның 100 чылы медалы, Комсомолдуң 100 чылы орден, “Ынакшыл, шынчы чорук” деп хөрек демдээ, Маадыр ие медальдыг мен.
Беш оол база 5 кыстың авыралдыг авазы, 19 уйнуктарымның энерелдиг энези мен.
“Шын” солун-биле кады кырып, номчуп, бижип чор мен. 80 харлаан байырлалымда “Тывамедиагрупптуң” директору Надежда Саттың холундан шаңналды алганымга өөрүп четтиргеним илереттим.
Чылбак МОНГУШ.
“Шын” №47 2023 чылдың июнь 28