«Абилимпикс» – уран-мергежил чемпионады

«Абилимпикс» – профессионал уран-мергежилдерниӊ национал чемпионадыныӊ регионалдыг чадазынга 163 кижи киржир дээрзин Тываныӊ Өөредилге яамызы дыӊнадып турар.

Регионалдыг чемпионаттыӊ киржикчилери шуру-чинчи дизер (бисероплетение), ыяштан чазаар, уран чурук даараар, чазаныр, даараныр, хеп быжар, аъш-чем кылыр, крючок-биле илбектеп аргыыр, спицы-биле аргыыр, чурук чуруур, идик септээр, веб-дизайн кылыр, очулдурар, сөзүглел бижип, ону эдип-чазаар, эмчи болгаш социал ажаалда, тыва хуужуур быжырар, хөмден кымчы болгаш янзы-бүрү эдилелдер кылыр талазы-биле уран-мергежилин көргүзер.

Чемпионат апрель 10-14 хүннеринде дараазында албан черлеринге эртер: Дыӊнаары багай уругларныӊ школа-интернады, Кадыы кызыгаарлыг уругларныӊ 10 дугаар школазы, Тываныӊ тудуг техникуму, Тываныӊ информастыг технологиялар техникуму, Тываныӊ политехниктиг техникуму, Республиканыӊ эмчи колледжизи, Тываныӊ күрүне университеди, «Бүгү-российжи күш-ажылдыӊ кызыл тук ордени» Ниити Россияныӊ инвалидтериниӊ хөй-ниити организациязыныӊ Тыва Республикада салбыры.

Уран-мергежил мөөрейлеринден аӊгыда, ажыл-агыйжы болгаш өөредилге программалары, мастер-класстар, хостуг ажылчын олуттарныӊ ярмарказы болур.

Инвалид болгаш кадыы кызыгаарлыг улустуӊ уран-мергежилиниӊ талазы-биле «Абилимпикс» чемпионады дээрге «Россия – хөй аргаларлыг чурт» деп президент платформазыныӊ бир кезээ.

Тывага апрель айда болур «Абилимпикс» чемпионадыныӊ тиилекчилери октябрь 17-25 хүннеринде Москва хоорайга Национал чемпионатка киржир.

Тываныӊ Чазааныӊ медээлери-биле Р. Демчик белеткээн.