Тываныӊ абитуриентилери дараазында өөредилге чылында бюджет хандырылгалыг черже дужаап кирип ап болур.
Россияныӊ дээди өөредилге албан черлеринге 2024-2025 өөредилге чылында бюджет хандырылгалыг олуттар санын көвүдедир. Ооӊ дугайында Россияныӊ Чазааныӊ оралакчы даргазы Дмитрий Чернышенко дыӊнаткан.
«Дээди эртем чедип ап болурун хандырар даалгалар ёзугаар алырга, 2024 чылда Россияныӊ дээди өөредилге албан черлеринге бюджеттиг олуттарныӊ санын көвүдедир. Келир өөредилге чылында бюджеттиг олуттарныӊ ниити саны 591 муӊ 967 болур. Бо өөредилге чылы-биле деӊнээр болза, ооӊ саны 1 муӊ 811 көвей болур. Луганск Улус Республиказыныӊ, Донецк Улус Республиказыныӊ, Херсона болгаш Запорожье областыӊ университеттеринге бюджет олуттарын онза чурум-биле хуваар. Инженерлер белеткээр программа талазы-биле бюджет олуттарныӊ санын өстүрген. Ону 2 муӊ 281 чедир көвүдеткен. Технология талазы-биле өске черлерден хамаарышпас болурун хандырар кадрларныӊ күжүн мөөӊнээр арга ол болур» ̶ деп, Д.Чернышенко чугаалаан.
Олуттарныӊ санын угланыышкыннар аайы-биле көвүдеткен. Кадык камгалалы болгаш медицина эртемнериниӊ адырынга – 772, Машиностроение – 505, Информатика болгаш санаашкын техниказы – 416, Электри болгаш чылыг энергетиказыныӊ адырынга 304 олутту немээр.
Биология эртемнериниӊ, электроника, радиотехника болгаш харылзаа системалары, информастыг айыыл чок чорук, математика болгаш бойдус эртемнери (естествознание), көдээ ажыл-агый болгаш көдээ ажыл-агыйныӊ эртемнери деп бөлүктерге оон-даа хөй бюджет олуттары немежир дээрзин тайылбырлаан.
Чурттуӊ, ооӊ иштинде Тыва Республиканыӊ дээди өөредилге черлеринге бюджет олуттарны бээринге хамаарыштыр чагыгларны ноябрь 1-ден тура чыып эгелээр.
Тываныӊ күрүне университединге бо чылын – 4126, республиканыӊ техникумнарынга 3 муӊ ажыг бюджет олуттарны берген.
Чурттуӊ дээди өөредилге албан черлериниӊ аразынга бюджет олуттарны хуваар конкурстуӊ түӊнелдерин үндүрер. Дараазында өөредилге чылында Тываныӊ өөредилге албан черлеринге чеже бюджет олутту бергени декабрь төнчүзүнде билдинер.
Р. Демчик белеткээн.