Школаларга сөөлгү коӊга эткен соонда, ортумак профессионал болгаш дээди өөредилге албан черлеринче дужаап киреринге белеткенир чымыштыг үе келир.
Эмчи шинчилгези эртер доозукчулар бичии пациентилер-биле деӊге оочурлап турарга, специалист эмчилерге түвектиг апаарын өөренип көргеш, Тываныӊ кадык камгалал яамызы ону барымдаалап, уруглар поликлиникаларыныӊ ажылдаар чурумун таарыштыр тургускан.
Июнь 13-тен тура поликлиника бүрүзүнге дежурный педиатр эмчи 13-17 шактарда ажылдаар.
«Поликлиникага чедип келген абитуриентини дежурный педиатр хүлээп алыр. Эмчи шинчилгезин ооӊ мурнунда эртип турган, тарылгаларны салдырган болза, медицинаныӊ чаӊгыс аай информация системазындан кижи бүрүзүнүӊ медээлерин хынаар. Эртер ужурлуг эмчи специалистеринче чорудар» — деп, Республиканыӊ уруглар эмнелгезиниӊ амбулатория-поликлиника ажылыныӊ талазы-биле кол эмчиниӊ оралакчызы Алла Куулар чугаалаан.
Оон аӊгыда, уруглар нарколог, дерматолог, фтизиопедиатр болгаш психиатр эмчилерге база шинчидер ужурлуг. Улуг класстарныӊ өөреникчилери эмчи шинчилгезин ооӊ мурнунда школаларынга эртип турган. Шак ол эмчи бижилгези бир чыл дургузунда күштүг болур. Специалист эмчилерге катап кирбейн, чүгле педиатр эмчиге кирер дээрзин тайылбырлаан.
Р. Демчик белеткээн.