Шагаа уткуштур тускай шериг операциязында шериглерге чедирип бээр белекти республиканыӊ чурттакчылары бир дем-биле чыгган.
Гуманитарлыг ачы-дуза чыыр республиканыӊ Каттышкан штавынга хүннүӊ-не дузаламчыны чон эккеп турар. Каттышкан штаб ачы-дуза чедирген улусту демдеглеп, аӊгы отчет кылып турар. Кижи бүрүзүнүӊ ат-сывын, чурттап турар черин, организациязын аӊгы журналга бижиир.
Чамдык биче сеткилдиг улус ат-сывын айтып бербээн. Ээрежип тургаш, чурукка оларны тырттырып турган. Чижээ, бирээзи, бажынга кедип алыр 64 фонарьны, батарейкаларны, рацияларны, ийигизи – артыштарны, үшкүзү – 10 кил тоорук сайын эккеп берген.
Кызылдыӊ хуу сайгарлыкчызы Щеглов хары угда 9 удуур хапты, Чөөн-Хемчиктен сайгарлыкчы Моӊгуш, Николай Данзы газ балоннарын, газ плиталарын, рацияларны берген.
Дүрген суурнуӊ ортумак школазыныӊ 3 «В» клазыныӊ өөреникчилериниӊ эвилеӊ-ээлдек чагааларын удуртукчу башкызы Чечена Санышировна Хаян бодунуӊ акша-хөреӊгизи-биле катай дамчыдып берген.
Республиканыӊ бүгү кожууннары, сумулары, ажылчын коллективтери ачы-буянныг дузаламчы чыырынга киришкен. Чылыг идик-хепти даарап, амданныг чаагай чемнерни быжырып, тараа-быдаазын хооруп, арбай далганын, чиӊге-тарааны-даа белеткээн.
Биче сеткилдиг, дузаарагак чоннуӊ аразындан онза хүндүткелдиг кижи Зинаида Епифоновна Лунько болган. Ол 90 харлыг эне. Ада-чурттуӊ Улуг дайыныныӊ үезинде ол бичии турган-даа болза, дайынныӊ айыыл-халавын чурттап эрткен, тайбыӊ чаагай чуртталганыӊ үнезин билир. Фронтуда шериглерге дамчыдып бээр аъш-чемниг посылказын боду белеткээш, Каттышкан штабка чедирип бээр кылдыр уругларын айбылаан болган.
Кезек кожууннарныӊ гуманитарлыг дузаламчызын улуг чүък машиназы-биле эккеп турар. Каттышкан штабтыӊ ажылдакчылары, «Кады бис!» деп шимчээшкинниӊ волонтерлары дүжүрүп алган.
Шагаада шериглерге чедирип бээринге белекти чон демнии-биле чыгган.
Р. Демчик белеткээн
