Күрүне эксперттери Кызыл хоорайныӊ аэропортун хынап турган. Чурттар аразынга агаар аргыжылгазыныӊ талазы-биле чогуур негелделерге ол дүгжүп турар деп өөрүнчүг медээни Тываныӊ Баштыӊы Владислав Ховалыг дыӊнадып турар:
«Тываныӊ Азия төвүнде кызыгаар чоогунда турары ооӊ аргаларыныӊ бир бажы болуп турар. Улаштыр ону бүрүнү-биле ажыглаар дээш, амгы үеде баазаны тургузуп ап турар бис. Чурттар аразыныӊ угланыышкынын сайзырадыры-биле авиацияга шыӊгыы ажылдарны чорудуп келген. Агаар аргыжылгазыныӊ эрттирилге пунктузунуӊ дерилгезин эде-хере кылган соонда, ведомстволар аразында комиссия Кызылдыӊ аэропортун хүлээп алырыныӊ дугайында актыга ат салган.
Инфраструктураны шупту негелделерге дүгжүп турар деп санаан.
Россияныӊ кызыгаар тудугларыныӊ, Россияныӊ Транспорт яамызыныӊ, кызыгаар болгаш каайлы албаннарыныӊ эксперттериниӊ түӊнелин алыр дээш, дыка улуг ажылды кылып чоруткан. Чаартып эде кылыр ажылдарны федералдыг акша-хөреӊги-биле кылган, ол чартык миллиард рубль өртектиг болган. «Күрүне кызыгаары» деп сорулгалыг программа-биле ол хөреӊгиниӊ чартык кезиинден безин ажыр шилчидип берген.
Ам Транспорт яамызыныӊ бистиӊ авиа-өртээливисти Россияныӊ делегей чергелиг аэропорттарыныӊ даӊзызынче киирерин болгаш РФ-тиӊ күрүне кызыгаарын таварыштыр агаар эрттирилге пунктузун ажыдарын манап турар бис.
Улаштыр өске чурттарныӊ, ылаӊгыя Улан-Батор, Урумчи, Пекин, Алматы хоорайлар-биле аргыжылганы аайлаштырып, авиакомпаниялар-биле ажылдап эгелээр бис» – деп, регионнуӊ удуртукчузу социал четкиде блогунга бижээн.
Р. ДЕМЧИК белеткээн.
«Шын» №97 2023 чылдың декабрь 20
