"Сүбедей" спорт өргээзинге январь 26-да Бай-Тайга кожууннуң ээлчеглиг ай хүрежин бедик көдүрлүүшкүннүг эрттиргеннер. Аңаа 18 харлыг – 75, шыырак 76 мөге киришкен.
Бай-Тайга кожуун чагырыкчызы Чиңгис Юрийевич Салчактың удуртулгазы-биле тыва чаңчыл ёзугаар “Эң аянныг тыва хеп”, “Хөй ажы-төлдүг өг-бүле”, “Эң улуг назылыг аарыкчы” деп мөөрейлерни эрттиргени кончуг солун болган. “Эң аянныг тыва хеп” мөөрейинге ак өңнүг кышкы тыва хептиг Кежик биле Сай-Суу Түлүштерниң өг-бүлези, “Хөй ажы-төлдүг өг-бүле” — Сылдыс биле Сай-Суу Кууларларның өг-бүлези, “Эң улуг назылыг аарыкчы” — 95 харлыг Чылбак-оол Конгар-оолович Хомушку олар тергиидээн.
Аныяк 18 харлыг мөгелер аразынга Максим Ооржак (Эрзин) шүүлген, Сүбедей Натсак-Доржу (Сүт-Хөл) үжүүрлешкен. “Чараш арга” дээш тускай шаңналга Айдыс Чаймаа (Тес-Хем), “Тиилелгеже чүткүл” — Чамян Кара-Сал (Кызыл), “Чараш девиг” — Сайын-Белек Седип (Бай-Тайга) олар төлептиг болганнар.
Улуг мөгелер аразындан Хартыга мөге Мөңге-Эртине Куулар (Чөөн-Хемчик) шүүлген, Хартыга мөге Кайгал-оол Ондар (Сүт-Хөл) үжүүрлешкен.
Дараазында февраль айда хүрешти Тере-Хөл кожуун организастап эрттирер.
А.ЧАМБАЛ-ООЛ
“Шын” №3 2024 чылдың январь 30