Андрей Ондар, ТР-ниң Садыг-саарылга палатазының президентизи:
— ТР-ниң Чазак Даргазы Владислав Ховалыгның ТР-ниң Дээди Хуралынга (парламентиге) Айыткалын улуг сонуургал-биле дыңнадым. Бодум улуг каттыжыышкынны удуртуп турар болганымда, чурттуң экономиктиг хөгжүлдезинче көрдүнген айтырыгларже кичээнгейни угландырдым. Мында кылдынган ажылдың улуг хемчээлдии каракка көстүп турар. Республиканың улуг-биче сайгарлыкчыларынга регионнуң удуртукчузунуң болгаш Чазактың талазындан көргүзүп турар улуг деткимчези эки түңнелдерни берип эгелээн. Ылаңгыя сайгарлыкчы ажыл-херээн ажыдып алган улустуң саны республикада 32 муң ажып турар, эрткен чылдарга деңнээрге, ийи катап көвүдээн.
Ол ышкаш Чазак Даргазы бодунуң Айыткалында ажыл-агыйның аңгы-аңгы адырлары, чижээ, көдээ ажыл-агыйда, болбаазырадылга үлетпүрүнде, тудугда болгаш бойдус курлавырында чаа үеге дүүшкен бүдүрүлгелерже кичээнгейни угландырганын демдеглекседим. Ол ышкаш улуг компаниялар бистиң республикавыста боттарының объектилерин ажылдадып эгелээнин демдегледи. Оон аңгыда, Кызылдың аэропорту бүгү-делегей чергелиг авиарейстерни хүлээп эгелээринге белеткенип, чогуур лицензиязын алганы, «Хандагайты – Боршоо» автомобиль эрттирилге пунктузун делегей чергелиг эде чаартыр дээн хемчеглер сайгарлыкчыларга моон-даа соңгаар чаа-чаа каналдарны тып, орулгалыг ажыл чорударынга дыка улуг ужур-уткалыг деп демдеглээр-дир мен.
"Шын" №4 2024 чылдың январь 20
