Владимир Тулуш, олимпийжи курлавырлар училищезиниң директору:
– ТР-ниң Баштыңы Айыткалда эрткен чылдың түңнелдерин база сагындырды. Оон алгаш көөрге, дыка хөй ажыл кылдынган-дыр. Ол бүгү РФ-тиң Президентизи Владимир Путинниң деткимчези-биле боттанган. 2023 чылда дыка хөй федералдыг төлевилелдер Тывага боттанган. Ук төлевилелдер 2024 чылда уламчылаар дээрзин чугаалады. Ынаар чаа школалар, эмнелгелер тудуглары дээш өске-даа чаартылгалар кирип турар.
2024 чылды РФ-тиң Президентизи Россияда Өг-бүле чылы кылдыр чарлаан. Хөй ажы-төлдүг болгаш аныяк өг-бүлелерге дыка улуг деткимчелер көрдүнген. Чурттаар оран-савага хамааржыр төлевилелдер база ынаар кирип турар дээрзи чугаажок. ТР-ниң Баштыңы Владислав Ховалыг регион девискээринге кадыкшыл чылын чарлады. Чылды өттүр кадыкшылга хамаарышкан хөй хемчеглер болур дээрзи билдингир. Чурттакчы чоннуң кадыкшылынче кичээнгейни салырын чугаалады. Республикага кадыкшыл чылын чарлаан болганда, аныяк-өскенге болгаш улуг назынныгларга ТШО киржикчилериниң кадыкшылынче хөй кичээнгейни угландырарын демдегледи. Ооң-биле чергелештир адаптивтиг спортту сайзырадыр даалганы Тываның Спорт яамызынга берди. Ыраккы Каа-Хемде тудуп турар спортчу комплексти ажыдары планда көрдүнгенин база демдегледи. Черле ниитизи-биле РФ-тиң Президентизи В. Путинниң деткимчези-биле Тыва чуртувус сайзырап орар-дыр.
Аныяктарже кичээнгейни салып турары кончуг эки-дир. Аныяктарывысты деткип, эки оран-савага чурттадып, кадыкшылын камгалаар болзувусса-ла, келир үевис бүзүрелдиг болур.
"Шын" №4 2024 чылдың январь 20
