Россия биле Моол эп-найыралдыг күрүнелер ийи чурттуӊ экономиктиг хөгжүлдезинге ажыктыг төлевилелдерни дугуржуп алгаш, боттандырып турар.
Бурунгу шаг-төөгүден бээр кожа-хелбээ чурттап келген моол, тыва чоннар амгы үеде ада-өгбелериниӊ ёзу-чаӊчылын сагып чоруурлар. Тываныӊ Баштыӊы Владислав Ховалыг Шагааныӊ ак айында Моол Арат Республиканыӊ Кызыл хоорайда элчин черинге барып чораан.
«Шагааныӊ ак айында Моолдуӊ чиӊгине консулу Чимид Ганболд-биле Кызылга ужураштым. Шагааны моолдар Цагаан Сар деп адаар, Чаа чыл-биле байыр чедирдим. Бистиӊ чоннарывыстыӊ чаӊчылдары дөмей. Шагааныӊ башкы айында бот-боттарыныӊ амыр-мендизин солчуп, чолукшуп, кады ажылдажылганы дугуржуп алыры чугула. Сайгарып чугаалажыр темалар чыглы берген. Ковид-биле холбаалыг кызыгаарлаашкыннарны ап каапканда, садыг-экономиктиг харылзааларны делгемчидери чугула. Көдээ ажыл-агый адырында, тодаргайлаарга, эът барааннарын болбаазырадырынга хамаарыштыр аӊгы бодалдар бар.
Үрде манаанывыс «Хандагайты – Боршоо» кызыгаар эрттирилге пунктузунуӊ чаартылгазын бо чылын доозарын планнап турар бис. Ийи талага – биске-даа, Моолга-даа – келир үеде кедилиг ажыл-иш-биле харылзаалыг болганы-биле, үрде манаан дээри ол. Оон аӊгыда, Кызылдыӊ аэропортунуӊ делегей чергелиг деп эрге-байдалын бадыткаптарга, кожавыста республикаже ужар авиарейстерни организастаары амыдыралга херек кырында боттаны бээр.
Тывадан девискээринден Россияныӊ, Моолдуӊ кызыгаарларын таварыштыр эртер орук коридорун кылыр төлевилелди боттандырарыныӊ дугайында чугаалаштывыс. Бистиӊ республикавыска ол дыка кол чүүл дээрзин катап-катап чугааларындан могавас мен.
Сибирь регионнарыныӊ экономиктиг күчүзүн хөгжүдерде, Чөөн чүкче көрнүр дээрзин Чурттуӊ Президентизиниӊ Айыткалында кирип турар. Красноярскыныӊ экономиктиг форумунга коллегаларым-биле бо теманы база сайгарып чугаалажыр мен. Ол бо хүн эгелей берген» – деп, Тываныӊ Баштыӊы Владислав Ховалыг социал четкиде блогунга бижээн.
Р. Демчик белеткээн.
