«Киштен киш кара, кижиден кижи кончуг» дижир болгай. Кижиниң намдары дээрге номчуттунмаан ном, ажыттынмаан үнелиг байлак дег болур. Бо сөстерни чон аразында ажылдап чоруур буянныг улуг башкы Клавдия Назыновна Сүлдүмге хамаарыштырып болур. Ол амгы үеде Тес-Хем кожууннуң Самагалдайның бир дугаар ниити билиг ортумак школазында орус дыл, чогаал башкылап ажылдап чоруур.
Ол уругларны орус дыл, чогаал олимпиадаларынга киириштирип, «Келир үеже базым» деп эртем-практиктиг конференцияларга белеткеп, янзы-бүрү мөөрейлерге деткип чорааны-биле олар тиилелгелиг черлерни хөй катап чедип ап келгеннер.
Клавдия Назыновна дөртен ажыг чылдарның дургузунда ажылдап келгеш, үре-түңнелдиг ажыл-ижи дээш хөй санныг шаңналдарга төлептиг болган. Тыва Республиканың Өөредилге яамызының хүндүлел бижиктерин, Тыва Республиканың Дээди Хуралының шаңналдарын, «Тес-Хем кожууннуң өөредилгезиниң алдарлыг ажылдакчызы» деп медалын, «Россия Федерациязының өөредилгезиниң алдарлыг ажылдакчызы» деп бедик атты алган хүндүлүг башкы.
К.Н. Сүлдүм амгы үениң алдар-аттыг мурнакчы башкыларының одуруунда шалыпкын ажылдап чоруур. «Мээң тергиин кичээлим» деп профессионал мөөрейге идепкейлиг киржип, тиилекчилер аразынче киргеш, ийи катап Москва хоорайга 1-ги черниң дипломун алган. «Өөредилге адырынга чедиишкиннери дээш» деп медальды 2021 чылда, «Өөредилгениң байлаа» деп медальды 2022 чылда Москва хоорайга алган.
Чүгле өөредилге эвес, а кижизидилге ажылын деңге чорудуп турар хүндүлүг башкывыс Клавдия Назыновна бо хүннерде республика чергелиг өөредиглиг семинарларга аныяк башкыларга арга-дуржулгазын дамчыдып чоруур.
Чечен ТАРЫЙ-ООЛ, Чыргаланды школазының орус дыл, чогаал башкызы.
"Шын" №4 2024 чылдың январь 20
