Шрифт
А А А
Фон
Ц Ц Ц Ц Ц
Изображения
Озвучка выделенного текста
Настройки
Обычная версия
Междубуквенный интервал
Одинарный Полуторный Двойной
Гарнитура
Без засечек С засечками
Встроенные элементы
(видео, карты и т.д.)
Вернуть настройки по умолчанию
Настройки Обычная версия
Шрифт
А А А
Фон
Ц Ц Ц Ц Ц
Изображения
Междубуквенный интервал
Одинарный Полуторный Двойной
Гарнитура
Без засечек С засечками
Встроенные элементы (видео, карты и т.д.)
Вернуть настройки по умолчанию

Алызы барып арыг-силиг компаниязы болур.

20 октября 2022
7

Амыдырал агымының аайы-биле бажың ажылынга үе чедишпейн баар таварылгалар тургулаар. Ылаңгыя хол-биле идик-хеп чуурунга эвээш эвес үе негеттинер. Хирлиг хепти боду чуп кааптар автомат машина садып алыры кижи бүрүзүнге болдунмас. Акшалыг-ла болза, хеп чуур черже дужааптары – үе камнап алырының база бир аргазы болу берген. Чеди-Хөл кожууннуң Хову-Аксы барык хоорай хевиринче кире берген хөй каът бажыңнарлыг суур. Ооң чурттакчы чонунуң саны 3700 кижи ажыг. Ындыг болганда, хеп чуур улуг машиналарлыг чер турары күзенчиг болбайн канчаар.

Кристина Сат биле Шораан Шожукпан хөй ажы-төлдүг кызымак өг-бүле. Олар Чонну ажылга хаара тудар төптүң харыылап турары социал керээ таварыштыр дузаламчы акша-хөреңгини алган. Ук акша-хөреңги-биле 10 кил хеп кирер үш, 15 килдиң бир база хептиң суун кургадыр сы тудар машиналарны садып алгаш, ажыглал чок турган оран-саваны септеп-селип, чугайлааш, прачечнаяны ажыдып алганнар. Ында идик-хеп, орун шывыглары, машина сандайларынга кедирер хаптар дээш оон-даа өске чүүлдерни чугдуруп турар.

Өгнүң херээжен ээзи Кристина Чылыг-электри төвүнде ажылдап турар. Амгы үеде ол дөрт дугаар уруун чиигеп алган. “Олут орбас, чыдын чытпас” кежээ кижи болгаш, уруг азырап олурар үезинде ол анаа олуруп шыдаваан. Хөй ажы-төлдүг өг-бүлеге немелде орулга канчаарга-даа артык эвес. Кожалары, төрел-дөргүлү, эш-өөрү автоматчыткан машинага хевин чуп бээрин бо-ла дилей бээр турган. Хеп чуур прачка ажыдар бодал өг-бүлениң бажынга ынчан кирип келген.

Оон аңгыда, орун-дөжек, диван, кресло дээш өске-даа эт-сеп хирлени бээрге, ону аштап-чууру база амыр эвес айтырыг. Кристина биле Шораан чуур тускай пылесос дузазы-биле мебельди аштап-арыглап берип турарлар.

Боттарының ажыл-агыйын ажыдып алгаш, чагыкчыларын көвүдедип алыры-биле, 3 дугаар хеп чугдуруп кээрге, халас болур акцияны база чарлаан. Чамдык хүннерде кижи аажок көвүдеп, узун оочур туруптар дээрзин Кристина Сат чугаалап турар. Ындыг үелерде өөнүң ээзи Шораан база өг-бүлениң эш-өөрү дузалажып чедип келир. Чоорту орулга көвүдеп, сайзырай бергеш, ажылдап турар оран-савазын улгаттырып, немей база машиналар садып алырын планнап турарлар.

Оон аңгыда улуг хемчээлдиг гараж кылгаш, автомашиналар чугдурар черни база ажыдар сорулганы салган. Аңаа чүгле автомойка турар эвес, ооң чанынга хевис, шывыглар чуур аңгы өрээлдиг болур. Чамдык улуска ажыл-агыйы көвүдеп, бажың-балгадын аштап-арыглаар үе чедишпейн баар таварылгалар база тургулаар. Ынчан бажыңынга баргаш, аштап-чуп бээр команданы база тургузуп алыксап турарын Шожукпаннар чугаалады.

Бо бүгүнү боттандырыптар болза, аштап-арыглаар компания тургустунуп келири билдингир. Шалып-ишчи өг-бүлениң күзелдери, сорулгалары боттаны бээрин күзеп каалыңар.

Арынны Чыжыргана СААЯ белеткээн.

Буян ООРЖАКТЫҢ тырттырган чуруктары.

false
false
false